"Психолог менен баарлашуу" рубрикасынын бул жолку чыгарылышында жолдошу жаш келинге кетип калган аялдын каты жарыяланды.
...Эки ай мурда 20 жылдан ашык бирге түтүн булаткан абышкам жаш келинге арзып калып, аны менен көмүскө жашай баштаганын уктум. Ошондон бери эмне ичип, эмне жеп жатканымды билбейм.
Бир жылдан бери эле башкача болуп, "иштерим менен жүрөм" деп үйгө деле токтобой калган. Жумушуна байланыштуу айылга көп каттачу. Көрсө, жаш аялга арзып жүрүптүр. Сураштырсам тапканы бир баласы бар, 35тердеги келин экен. Башында күбүр-шыбыр кепти элден уктум. Ишенген эмесмин. Андан кийин "кечирип кой, мен башка адамды жактырып калдым" деп өзү айтты. Бул окуяны балдар билбейт. "Аялын таштап башкага кетип калыптыр" деп укчумун. Бирок этибар алып, менин башыма ушул окуя келерин ойлобоптурмун. Чоң сокку болду. Балдарыма айтсам атасын биротоло жаман көрүп калышабы деп корком.
Күйөөм үйдөн биротоло кетип калган жок. Анда-санда келип, балдардыкына барып кетет. Унчуккан жокмун, жайына койдум.
Азыр эч нерсеге каалоом жок. Чет өлкөдөгү кызыма шылтоолоп ошол жакка кетип калгым келип жүрөт. Кетип калсамбы? Суроо көп...
"Психоанализ.кг" психотерапия борборунун жетекчиси Муратбек Султанбеков:
— Мындай көйгөй коомдо болуп келген, боло берет. Албетте, үй-бүлөдө жубайлардын ортосундагы мамиленин бузулушу экөөнө тең, балдарга да чоң сокку. Бирок ошол нерседен туура жыйынтык чыгаруу керек. Эмне себептен илгери биздин ата-энелер көп ажырашчу эмес. Ажырашуулардын саны аз болчу. Себеби үй-бүлө институту деген бар эле, система башкача болчу. Алсак, Советтер Союзу учурунда эгер үй-бүлө, бала-чакасы жок же ажырашып кеткен неме болсо "үй-бүлөнү тыңдай албаган иште эмнени кыйратат" деп ага кызмат да берчү эмес. Азыр система башкача. Жаш үй-бүлөлөргө ата-энеси үйүн, унаасын баарын белендеп берип коёт, жаш жубайлар жашоого адаптация болбой калышат. Кыйынчылыкка туруштук бере албай ажырашып кетишет.
Ортодо баарлашуу жок болгон учурда да жубайлардын ортосунда мамиле сууйт. Кызыкчылык бир болушу керек. Балдары окууну бүтүп, өзүнчө үй-бүлө куруп кеткенден кийин жубайлар кайрадан жаңы сүйлөшүп баштаган кыз-жигиттей мамилесин бекемдөөгө аракет кылганы оң. Анткени башында балдарына байланып, алар менен сүйлөшүп, аларды башкарып көнүшкөн да, балдар кеткенде бири-бирине чоочун адамдардай болуп калышат.
Менин оюмча, кат жазган аял менен күйөөсүнүн мамилесине чекит коюла элек. Келип-кетип турат экен. Демек, ойлонуп жүрөт же толук чечимди өзү да кабыл ала элек. Ошондуктан дагы кеч эмес. Өзүңүздү, ага болгон мамилеңизди өзгөртүп, аны кайтарып алууга аракет кылыңыз.
Жаш кезде ажырашкандан дагы 40тан ашып калганда эки ажырым жолго түшкөн оор. Ошондуктан үй-бүлөнү сактап калууга аракет кылыңыз.