БИШКЕК, 26-сен. — Sputnik. Нарын районунун Кеңеш айылында контейнерде билим алган окуучулар октябрь айынын баштапкы күндөрү айылдын клубуна көчүрүлөт. Бул тууралуу облустун администрациясынын маалымат кызматынан билдиришти.
"Кеңеш айылына былтыр жаңы клуб курулган. Азыр аны балдардын билим алуусуна ыңгайлаштырып, класстарга бөлүп, жылуулук берүү системасын жасап чыгышты. Даярдык иштери аяктап калды. Октябрь айынын алгачкы күндөрү окуучулар ал жакка көчүрүлүп, жаңы мектептин курулушу аяктагыча окушат", — дешти маалымат кызматынан.
Эске салсак, жаңы окуу жылында Кеңеш айылына контейнерден жасалган алты мобилдик үй жеткирилип, анын ачылышы өткөн. Аземге Нарын районунун акими Семетей Черикбаев, Нарын облустук билим берүү башкармалыгынын жетекчиси Касымбек Мамытов баштаган аткаминерлер катышкан.
Айрымдар мектеп салууну демилгелеп, курулуш материалдарын, акча каражатын чогулта баштаган. Бирок өкмөт элден мындай жардам алуудан баш тарткан.
Өкмөттүн Нарындагы өкүлчүлүгү мектептин имараты авариялык абалда болгону үчүн балдардын коопсуздугун сактоо максатында мобилдик үй алып келинип, бирок окуучулар суук түшкөнгө чейин жылуу имаратка көчүрүлөрүн айткан.
Маалыматка караганда, жаңы мектептин долбоордук-сметалык документациясы даяр, жакынкы арада куруу иштери башталып, 2020-жылы ишке берилет.
Биздин Telegram-каналга жазылыңыз.