БИШКЕК, 19-авг. — Sputnik. Чуй облустук соту экс-депутат Садыр Жапаровго мунапыс берүүдөн баш тартты. Бул туурасында Sputnik Кыргызстандын кабарчысы сот залынан билдирди.
Буга чейин Жаза аткаруу мамлекеттик кызматы саясатчыга мунапыс берүү сунушу менен Аламүдүн райондук сотуна кайрылган. Бирок ал канааттандырылган эмес. Бүгүн облустук сот райондук соттун чечимин күчүндө калтырды.
"Биз соттон Жапаровдун мөөнөтүн үч жыл төрт айга кыскартып, шарттуу түрдө бошотулушун сураганбыз. ЖАМК жаңы кодекстерге ылайык Жапаровдун иши өзгөчө оордон оор кылмыштарга алмашып, 2014-жылдын 27-январында чыккан "Мунапыс жөнүндөгү" мыйзамды колдонууну сунуштаган. Бирок Аламүдүн райондук соту "алты айлык мөөнөт өтүп кетти" деген жүйө менен канааттандырган эмес", — деди экс-депутаттын жактоочусу Шарабидин Токтосунов.
Мындан улам жактоочулар биринчи инстанциянын чечимине каршы облустук сотко арыз жазган.
Экс-депутат "2013-жылы октябрда Кумтөр маселесине байланыштуу Караколдо болгон митингде ошол кездеги Ысык-Көлдүн губернатору Эмилбек Каптагаевди барымтага алууну уюштурган" деп айыпталып, 11 жыл 6 айга кесилген.
Кийинчерээк Жапаровдун адвокаттары анын жаза мөөнөтүн азайтуу өтүнүчү менен кайрылып, сот бир жарым жылга кыскарткан.
Учурда ал Молдовановка айылындагы биринчи колонияда жазасын өтөп жатат.