БИШКЕК, 10-авг. — Sputnik. Нарын облусунда коомдук-саясий абал туруктуу экенин өкмөттүн маалымат кызматы кабарлады.
Кечээ, 9-август күнү, Кара-Чий айылынын тушунда 300гө жакын киши чогулуп, алардын талабы өкмөткө жетпей жатканын айтып нааразы болушкан. Нарын облустук милициясынын маалымат катчысы Кундуз Эсенгулова коомдук коопсуздукту сактоо үчүн Бишкектен да милиция кызматкерлери чакыртылганын айткан.
Өкмөттүн маалыматында, кечке маал Бишкек — Нарын — Торугарт автожолундагы Кара-Чий айылынын жанында чогулган эл жергиликтүү бийлик өкүлдөрү менен эки тараптуу бир нече сүйлөшүүлөрдөн соң боз үйлөрүн чечип, тарап кетишкени айтылат.
"Өкмөттүн Нарын облусундагы өкүлү Аманбай Кайыпов, Нарын районунун акими Семетей Черикбаев баш болгон жергиликтүү бийлик өкүлдөрү Солтон-Сары кениндеги Zhong Ji Mining Company кытай компаниясынын ишине тийиштүү маселе боюнча чогулган элдин лидерлери менен бир нече ирет жолугуп сүйлөшүшкөн. Кайыпов учурда болуп жаткан саясий абалды эске алып, чогулган эл чагымчылыкка жана бузуку күчтөргө кабылып калбашы керектигин эскертти. Ал эми эл Солтон-Сары кениндеги маселе боюнча гана чогулганын, андан башка максаты жок экенин айтты. Натыйжада элдин талабы угулуп, аларды мыйзам чегинде чечүү максатында тийиштүү протокол түзүлдү. Андан соң топтолгон эл боз үйлөрүн чечип, тарап кетти", — деп айтылат маалыматта.
6-август күнү кечинде Кытайдын Кыргызстандагы элчилиги билдирүү таратып, кыргыз өкмөтүнө бир катар талаптарды койгон. Кытай компаниясы бир айга чейин ишин убактылуу токтотту.
8-августта премьер-министр Мухаммедкалый Абылгазиев Жогорку Кеңештин кезексиз жыйынында Солтон-Сарыдагы чыр эмнеден келип чыкканын айтып берген.