БИШКЕК, 11-июл. — Sputnik. "Айыл Банктын" төрагасы Бактыбек Шамкеевдин артында турган балага кол чатыр карматып турган сүрөтү социалдык тармакка тарап жатат. Банктын маркетинг бөлүмүнүн башчысы Нурила Чекирова Facebook баракчасына жарыялаган сүрөттө ал даана көрүнүп турат.
"Дем алыш күнү башкы кеңсенин жамааты менен жаратылыш койнунда палоо фестивалын өткөрдүк. Абдан даамдуу болду, жайдары маанайда ырдап бийледик, рэп окудук", — деп жазды Чекирова.
Ал сүрөттү социалдык баракчасына 8-июлда жарыялаган.
Банктын маалымат кызматы аталган сүрөт боюнча түшүндүрмө берди. Ага ылайык, эртең менен жаан жаап, бир аздан кийин кайра күн ысыган. Калыстар отурган жерге (калыстардын катарына Шамкеев дагы кирген) күн катуу тийип жаткан.
Ал ошондой эле сүрөттү жакшылап караганда фотографка да кол чатыр кармап берип турганын көрүүгө болорун кошумчалады.
"Шамкеев ага кол чатыр кармап берип жатканын байкаганда анын кереги жок экенин айтты. Жигит болгону 3-5 мүнөттөй эле кармап турду, анын бардыгы видеого түшкөн. Башка сүрөттөрдө калыстар кол чатыры жок эле отурган", — деди Валиева.
Банк видеонун скриншотторун далил катары жөнөттү.
"Айыл Банк" мамлекетке таандык.
Эске салсак, Бишкектин мурдагы прокурору Нурлан Сулайманкуловго жардамчысы аркасында кол чатыр көтөрүп турган сүрөтү социалдык тармактарга тарап кеткен. Мындан улам аны "бай-манап" деп жемелегендер көп болгон. Ушундай эле көрүнүшкө Ош облусунун мурдагы башчысы Таалайбек Сарыбашев менен Ош шаарынын мэри Айтмамат Кадырбаев кабылган.