ЫСЫК-КӨЛ, 27-июн. — Sputnik. Ысык-Көлгө Өзбекстандан туристтер жана журналисттер учуп келгенин Sputnik Кыргызстан маалымат агенттигинин аймактык кабарчысы билдирди.
Конокторду "Тамчы" аба майданынан салтанаттуу түрдө Туризм департаментинин директору Максат Дамир уулу, Ысык-Көл районунун акими Данир Иманалиев жана башка жергиликтүү бийлик өкүлдөрү тосуп алышкан.
"Учак жарым саат эрте конду. Муну менен биз Ысык-Көлгө жол кыска экенин айткыбыз келет. Мен сиздердин эс алууңуздар кызыктуу жана эсте каларлык болоруна ишенем. Биздин жерге кош келиңиздер. Эки өлкөнүн достугу бекемдей берсин", — деди район жетекчиси Иманалиев.
Ташкент — Тамчы каттамы менен быйылкы эс алуу сезонунда үч миңден ашуун адамды кабыл алуусу күтүлүп жатканы кошумчаланган.
Ысык-Көлгө Ташкенттен алгачкы аба каттамы 2017-жылы ачылган.