Конституцияда депутаттардын статусу жөнүндө мыйзам бар. Ал мыйзамда эл өкүлдөрүнүн мандаттары тууралуу так көрсөтүлгөн. Андыктан, Мусаевди мандаттан ажыратуу "Кыргызстан" фракциясынын ички маселеси. Бул тууралуу Дастан Жумабеков Sputnik Кыргызстан радиосунун эфиринде маек куруп жатып маалымдады.
Анын айтымында, фракциянын лидеринин атынан төрагага депутат Насыр Мусаевди мандатынан ажыратуу боюнча кайрылуу келип түшкөн.
"Депутат Насыр Мусаевди мандатынан ажыратуу же ажыратпоо фракциянын ички иши. Эреже боюнча бардык процедуралардан кийин Борбордук шайлоо комиссиясы чечим чыгарат. Насыр Мусаев келип, ант берип мандатын алган. Бүгүнкү күндө депутат катары саналат. Мыйзам боюнча бир сессияда 30 жыйынга себепсиз келбеген эл өкүлү мандатынан ажыратылат. Ал эми бул депутат ден соолугуна байланыштуу келе албай жүргөн. Медициналык тастыктамалары бар экен. Эми алардын баарын эсептеп, карап чыгуу керек. Учурда ушул иштер жүргүзүлүүдө. Баары мыйзамдын негизинде чечилет", — деди Жумабеков.
Төрага ошондой эле 120 депутаттын укуктары бирдей экендигин кошумчалады.