БИШКЕК, 18-май — Sputnik. Премьер-министр Мухаммедкалый Абылгазиевдин бажасы Иманкадыр Рысалиев "Ачык өкмөт" программасынын катчылыгынын жетекчилигинен кетүү боюнча арызын жазгандыгын Sputnik Кыргызстан маалымат агенттигине тастыктады.
"Байкоочу кеңештин мүчөлөрүнөн менин ордума башка талапкерди таап, сунуш кылгыла, ЕККУ (Европалык коопсуздук жана кызматташуу боюнча уюму) тандасын деп сурандым. Болбосо жанагыдай фейк жаңылыктарды таратып эле жинди кылып жатпайбы. Мындай кадамды өзүм иштеп келген "Ачык өкмөт" долбооруна кедергиси тийбесин деген максат менен жасадым", — деди Рысалиев.
Ал бир жылдан бери аталган кызматта иштеп келгенин айтып, чечимди качан кабыл алганын кошумчалады.
"Бул чечимди эртең менен өзүм кабыл алгам. Анан премьер-министр жана башка деген маалыматтар чыгып калды. Мейли эми андай деле болсун. Негизгиси бул менин жеке чечимим", — деди Рысалиев.
Бүгүн өкмөт башчы Мухаммедкалый Абылгазиев "Ачык өкмөт" долбоорунун катчылыгынын жетекчиси Иманкадыр Рысалиевди кызматынан алуу сунушун киргизген.
Жамангуловдун айтымында, Рысалиев мындай жол менен "КТ Мобайл" ишканасын ишке киргизүү үчүн каражат которуусун талап кылган. Бирок Рысалиев аны туура эмес деген пикирин тараткан.
Андан мурдараак "КТ Мобайлдын" жетекчилери 300-350 миң маяна алары айтылып, директордун орун басары өкмөт башчы Мухаммедкалый Абылгазиевдин бажасы Иманкадыр Рысалиевдин баласы экени ачыкталган.
Бул коомчулукта резонанс жаратып, жетекчилердин баары иштен кетүүгө мажбур болду.