БИШКЕК, 17-май — Sputnik. Социалдык тармакта эркек кишинин токмок жеп жаткан видеосу боюнча сотко чейинки иликтөө иштери башталганын ИИМдин маалымат кызматынан кабарлашты.
Видеону коштогон текстте таяк жеген киши мурдагы атайын даярдыктагы жоокер, ал эми кол көтөрүп жаткандар уюшкан кылмыштуу топтун мүчөсүнүн бири экендигин айтты.
"Андагы жарандардын ким экендиги аныкталды. Алар Сузак районунун үч тургуну менен Таш-Көмүр шаарынын жашоочусу болуп чыкты. Андан сырткары, уюшкан кылмыштуу топтун Чач деп аталган 31 жаштагы мүчөсү, кыязы, чатактын демилгечиси", — деп айтылат маалыматта.
Алдын ала берилген маалыматтар боюнча, 2019-жылдын 7-майында жабырланган жаранга 7-8 киши келип, эч себепсиз сабаган. Алардын бири бычак такаса, экинчиси тапанча менен коркутуп, мунун баарын телефон аппаратынын камерасына тарткан.
Аталган факты Кылмыштар менен жоруктардын бирдиктүү реестрине Жазык кодексинин 226-беренесинин негизинде ("Бейбаштык") катталган. ИИМдин Криминалдык милициясы жана Жалал-Абад облустук тартип сакчылары шектүүлөрдү кармоо боюнча ыкчам жана издөө иштерин жүргүзүп жаткандыгын айтышты.