Табылды Эгембердиевсиз төрт жыл... Эстелик сүрөттөр

Табылды Эгембердиев улуттук суусундуктарды дүйнөгө тааныта алды

13 жашка толгондо атасы дүйнө салып, ата ордуна ата болуп, апасы Сүйүнгө жөлөк, иниси Жумадылга көмөк, карындашы Анарканга тирек болуп, айылдын оор турмушун башынан кечирген.

1972-жылы Фрунзе политехникалык институтун аяктап, инженер-курулушчу кесибине ээ болгон.

"Бир тууганым — чыгармачыл киши, тили аябай курч. Чыгармачыл адамдардын баары элегей болушат эмеспи, ал көп ойлонот, мен азыркыга чейин анын артынан баарын — костюмун, портфелин жыйнап жүрөм" (Жумадыл Эгембердиев бир тууганы жөнүндө).

Жубайы Жаңылсынзат Турганбаева менен

Жаңылсынзат Турганбаева менен бир уул, бир кызды тарбиялаган. Жаңылсынзат айым Жусуп Баласагын атындагы КУУнун тарых факультетин бүткөн. Учурда жолдошунун ишин улантып келет.

Расмий документте Табылды Эгембердиев 1951-жылдын 14-январында Чүй облусунун Жайыл районуна караштуу Букара айылында туулган деп жазылган. Бирок анык туулган күнү 1950-жылдын 28-декабры деп айтылып келет.

Табылды Эгембердиев 1990-жылдары Кыргызстан демократиялык кыймылынын (КДК) Башкаруу кеңешинин мүчөсү болуп, катчылык иштерин аркалап, коомдук-саясий турмушка активдүү аралашкан.

Ал өткөөл мезгилдеги коомдук, саясий-экономикалык терс көрүнүштөргө өзүнүн пикирин ачык билдирип, байма-бай курч макалаларды жазып турган.

Өзүнүн "апамдын 4 кой, 2 эчкисин сатып, үйдөн эле максым жасоону чечтим. Алгач 2 казан максым жасап, базарга жөнөттүк. Балдар түшкө жетпей эле келип калышты. Эртеси күнү 4 казан максым даярдадык, ошентип уланып кетти" деп айтканы бар.

2009-жылы "Супара" этнокомплексин, ал эми 2014-жылы тоо туризмин өнүктүрүүнү максат кылып, өлкөдөгү уникалдуу "Супара-Чуңкурчак" этно эс алуу жайын түптөгөн.

Табылды Эгембердиев узакка созулган оорудан улам 64 жашында каза болгон