БИШКЕК, 21-апр. — Sputnik. Шри-Ланкадагы чиркөөлөр менен мейманканалардагы жардыруудан каза болгондордун саны 160ка жетип, 360 киши түрдүү жаракаттарды алды. Бул тууралуу News 1ST телеканалы билдирди.
Социалдык тармактарга мейманкана менен чиркөөлөрдөгү жардыруудан кийин тартылган видеолор тарап жатат. Андан талкаланган чиркөөнүн ичин, терезеси сынган мейманканаларды көрүүгө болот.
Ada Derana басылмасынын жазышынча, 21-апрелде Коломбо шаарындагы Shangri-La, Cinnamon Grand жана Kingsbury мейманканаларында жана католиктердин Пасха майрамы белгиленип жаткан Котахена, Негомбо менен Баттикалоа шаарларындагы үч чиркөөдө жардыруу болгон.
Учурда окуя болгон жерде полиция иштеп, жарылуу болгон аймактарды курчоого алды. Ал ортодо Коломбо шаарындагы эл аралык аэропортто коопсуздук талаптары күчөтүлдү.