БИШКЕК, 14-апр. — Sputnik. Казакстандык ырчы Димаш Кудайберген Кытайдын QQ music платформасында алдыда келе жатат. Жаңылык менен артист өзү социалдык тармактагы баракчасына бөлүшкөнүн Sputnik Казакстан агенттиги жазып чыкты.
"Бул ыр тууралуу кандай пикирдесиңер?" — деп ырчы угармандарына кайрылган.
Lay Down аттуу композициянын (сокур намыстан арылууга чакырган ыр) бет ачары 10-апрелде өткөн. Эртеси эле чыгарма чарттын Most popular golden single record (эң популярдуу алтын сингл) наамын алган.
Димаш Кудайберген үстүбүздөгү жылдын октябрь айында Нью-Йорктогу Madison Square Garden аренасында концерт коеру белгилүү болгон. Азырынча так күнү белгисиз болгону менен Казакстандын маданият жана спорт министри Арыстанбек Мухамедиулынын айтымында, билеттин баасы кымбат. Белгилей кетсек, Madison Square Garden беш миңден 15 миңге чейинки көрүүчүнү батыра алат.
Димаш 29-июнь күнү Борбор калаанын күнүнө карата Нур-Султанда "Арнау" деп аталган майрамдык шоу тартуулайт. Ал эми 26-октябрда Игорь Крутойдун Нью-Йорктогу Barclays Center аренасында өтө турган мааракелик концертине конок катары чакырылган.