БИШКЕК, 26-мар. — Sputnik. Россиялык делегацияга негизинен улуттук тамак-аш сунулат. Бул тууралуу маалымат жыйында президенттик аппараттын тышкы саясат бөлүмүнүн башчысы Данияр Сыдыков айтты.
Эскерте кетсек, Россия президенти Владимир Путиндин мамлекеттик сапары 28-мартка белгиленген.
"Кыргыздар меймандостугу жана жайыл дасторкону менен өзгөчөлөнгөн эл. Мартабалуу конокторду дал ушундай тосууну пландап жатабыз. Ата-бабаларыбыздын тамак-ашы менен таң калтыралы деген оюбуз бар", — деди Сыдыков.
Ал эми жок дегенде берилчү тамактын бир түрүн айта кетүү өтүнүчүнө Сыдыков "Бешбармаксыз болмок беле" деп жооп берди. Ага улай дасторконго Европанын да даамы коюларын кошумчалады.