БИШКЕК, 19-фев. — Sputnik. Кемин аймагындагы Боролдой айылында эки бөтөлкөлөштүн бири экинчисин өлтүрүп салганы Жогорку Соттун сайтында маалымдалган. Sputnik Кыргызстан аталган документти барактап көрдү.
Кандуу окуя 2017-жылдын 24-ноябрында болжол менен түнкү экилер чамасында болгон. Соттук чечимди Кемин райондук фемида өкүлдөрү чыгарган. 33 жаштагы соттолуучу Бишкекте туулуп, Боролдой айылында жашап турган. Жогорку билимдүү экени, бойдоктугу, убактылуу эч жерде иштебегендиги, мурда соттолбогону жана уулун тарбиялап жатканы маалымдалган.
Окуяда баяндалган каармандардын ысымдары өзгөртүлдү.
Соттолуучу эмне деди?
23-ноябрда ага Таалай аттуу досу чалып, арак ичели дегенинен баш тартып койгон. Досу дагы чалып, кызынын туулгандыгын белгилейли деген сунуш киргизгенде макул болгон. Бир жарым сааттан кийин ал дагы бир жолдошу менен келген. Соттолуучу рулда Таалай отурганын, бирок экөө тең мас экенин айтты.
Таалай кетем дегени менен Нурбек аны кал деп суранып туруп алып, майрам уланган. Акыры ал автоунаасын айдаган тейде кетип калган. Үйдө Нурбек, Таалай жана анын уулу калган. Ичкилик майрамы уланып, акыры Нурбек кожоюндан арак талап кыла баштап, үй ээси моюн толгогон. Экөө айтышып, андан соң кармаша кетет. Нурбек бычакты ала коюп, балага кезегенде, соттолуучу аны колунан жулуп алып, экөө бычакты талашып, жулкулдашып калган. Үй ээси уулу алар ойноп жатат деген ой менен аларга жакындап келди окшойт деп айтып берген. Нурбек бөбөктү түртүп жибергенде, бала дубалга бир тийип, ыйлай баштаган. Уруш учурунда конок балага өткөн, ал эми соттолуучу эсин жоготуп койгон. Ал эми көзүн ачканда Нурбек коридордо жаткан. Соттук актыда айыпталуучу урушкан кишисинин кандай абалда жатканын көргөнү так жазылган эмес.
Соттолуучу күнөөсүн мойнуна алган жок
Таалай эмне деди?
Ал 23-ноябрь күнү кызынын туулганын белгилөөнү соттолуучуга сунуштаганы менен берки баш тарткан. Ага карабай Таалай дагы бир жолдошун ээрчите келип, аракты үчөө ичкен.
Андан аркы көрсөтмөлөрү дээрлик айыпкердикиндей чыккан. Бир гана жери — Нурбек аны кетпе деп суранганын эстей алган жок.
Соттолуучу мас беле?
Сот отурум учурунда алты күбөнү суракка алганда, баары бир ооздон айыпкердин ал күнү арак ичкенин айтып беришкен.
Материалда анын мас экендигин тастыктаган далилдер жок болгондуктан, айыпкерге соттук-психиатриялык экспертиза дайындаган.
Эксперттердин бүтүмү
Соттук медициналык экспертиза Нурбекке бычак 12 ирет сайылганын билдирип, ал ажалга алып келген, ден соолукка оор зыянын тийгизген деп баалады. Ал кансырап каза болгон.
Соттук-психиатриялык экспертиза айыпкердин кылмыш учурунда мас болгондугун аныктап берген. Анын аффект абалында болбогону да айтылган. Айыпталуучу эмне кылып жатканын акылы менен сезип-билип турган деген аныктама чыгарган.
Соттун чечими
Сот айыпкер арак ичкендигин, уруш учурунда бычакты Нурбектен сууруп алып, 12 ирет сайган деп тапты жана кылмышты атайылап жасаган деди.
Андан сырткары, Кемин райондук ИИБинин тергөөчүсү менен тергөө кызматынын жетекчиси мыйзамдын талаптарын бузгандыгы үчүн жазага кириптер болду. Материалда айыпталуучунун арак ичкени боюнча далилдер жетишсиз болгондуктан, соттук иштер татаалданган. Кошумча экспертизаларды дайындоого, жаңы күбөлөрдү чакырууга туура келген.