БИШКЕК, 4-фев. — Sputnik. "Айыл чарбасын каржылоо-7" долбоорун ишке ашыруу башталды. Бул тууралуу өкмөттөн кабарлашты.
Тиешелүү буйрукка премьер-министр Мухаммедкалый Абылгазиев кол койгон.
"Айыл чарбасын каржылоо-7" долбоору ишкердик субъектилердин жана жеке жактардын 2019-жылдын жазгы талаа жумуштарын өз убагында жүргүзүүсүнө багытталган", — деп айтылат маалыматта.
Асыл тукум жана үрөн чарбаларына, кант кызылчасын өстүрүү менен алектенген субъектилерге артыкчылык берилет.
Ал эми жылдык үстөгү сегиз пайызды түзгөн насыялар төмөнкү багыттарга берилет:
- Бак өстүрүү жана ургаалдуу токойчулук менен алектенген субъектилер;
- Күнөскана чарбасы менен алектенген жана тамчылатып сугаруу тутумун киргизүү боюнча субъектилер;
- Асыл тукум мал же жасалма жол менен уруктандыруу жабдууларын сатып алуучу субъектилер.
Жылдык үстөгү 10 пайызды түзгөн насыя "Мал чарбачылыгы" жана "Өсүмдүк өстүрүү" тармактары үчүн белгиленген.
"Насыянын мөөнөтү 36 айдан ашык эмес. Бирок бак өстүрүүгө, ургаалдуу токойчулукка, үрөн өстүрүү жана асыл тукум чарбаларына, тамак-аш, кайра иштетүү ишканалары, күнөскана, тамчылап сугаруу системасын киргизүүгө берилүүчү насыялардын төлөө мөөнөтүн 60 айга чейин белгилөөгө уруксат берилет", — дешти өкмөттөн.
Мындан сырткары, 150 миң сомго чейинки жеке насыялар жана 500 миң сомго чейинки топтук насыялар күрөөсүз негизде 18 айга чейин берилиши мүмкүн. Бул максатка багытталган каражат жалпы насыялоонун жети пайызынан ашпашы керек.
Жеңилдетилген убакыт: карыздардын негизги суммасын төлөөдөн алты айга чейин бошотуу мүмкүн.
Асыл тукумдуу малга төмөнкүдөй породалар кирет:
- бодо мал (ала тоо, карала, аулие-ата, ошондой эле голштин, жерсей, симменталь, айшир, герефорд, голланд, ярослав, холмогор, күрөң швиц уйлары), топоздор жана жылкылар;
- кой (уяң жүндүү, тянь-шань жарым уяң жүндүү, алай, гисар жана меринос).
Бул тармактагы субъектилер ушул долбоордун алкагында бир зайымчыга үч миллион сомго чейин насыя ала алышат.
Асыл тукум мал жана жасалма жол менен уруктандыруу боюнча субъектилерге 10 миллион сомго чейин насыя берилет.