Футбол боюнча Азия кубогунда БАЭ командасы менен болгон оюндун соңунда Ахлетдин пас чыгарып берип калды. Бул учурда дарбазачы да жакындап калгандыктан, тез арада аракет көрүш керек эле. Мен дарбазачыны алдап туруп гол киргизе аларымды бир ирмемде түшүндүм. Бул тууралуу Мирлан Мурзаев Sputnik Кыргызстан радиосунун эфиринде маек куруп жатып айтып берди.
Футболчу улуттук команданын оюнчуларында "ким гол киргизсе да Кыргызстан утсун" деген зор каалоо болгонун белгилеп өттү.
"Азия кубогунда мен голго суусап турдум. Гол киргизе албай мекениме кетпесем экен деп тилек кылып жаттым. Бизде командалык ынтымак күчтүү болду. Оюн талаасында биздин гана күйөрмандардын кыйкырганы угулуп жатты. Алардын ишенимин актап, гол киргизсем экен деп турсам, Ахлетдин пас чыгарып берди. Ал менден алысыраак болуп, дарбазачы да камынып келип калды. Мен дарбазачыны алдап гол киргизип кеткенге мүмкүнчүлүгүм бар экенин бир ирмемде түшүнүп, абалды колдон чыгарбаш керек деп ойлодум. Бутум тепкенге даярданып жатып да, топту тебелеп албасам экен деп корктум. Гол киргенде күйөрмандардын кыйкырыгын угуп, жүрөгүм дүкүлдөп кетти, абдан сүйүндүм", — деди Мурзаев.
Футболчу учурдан пайдаланып футбол боюнча улуттук команданын жалпы күйөрмандарына ыраазычылык билдирди.
Азия футбол конфедерациясынын расмий сайтындагы добуш берүүнүн жыйынтыгы менен биринчи орунга вьетнамдык спортчу Нгуен Конг Фыонг 217 миң добуш алып татыса, Мирлан Мурзаев экинчи орунду багындырган. Ага 59 миңден ашуун адам жан тарткан.