ӨКМдин берген маалыматына ылайык, жыл башынан бери өлкөдө 80 адам сууга чөгүп каза болуптур.
Кырсыктарды алдын алуу максатында Sputnik Кыргызстан агенттигине ӨКМдин Бишкек шаардык куткаруу кызматынын башчысы Мелис Назарбеков сууга түшүүдө эске алчу эрежелерди айтып берди.
Жаш балдарды кароосуз калтырбайт. Балдарды сууга түшүрүүдө алардын жанында көз салган ата-энеси же чоңураактар сөзсүз болушу керек. Суу жээгинде ойноп отурган бөбөктү да улам карап турбаса, көз ачып жумгуча аны таппай калышыңыз мүмкүн.
Белгиленген чектен ашпайт. Куткаруучулар тарабынан коюлган атайын чектен ашып кетпеш керек. Белгиден өтүп кеткен адамдын өмүрүнө эч ким жоопкер эмес. Чоңдорго 1,5 – 2 метрден терең жерге барууга тыюу салынат. Атайын белгилер – буйлар бар. Бирок айрым эс алуучулар алардан деле өтүп кетип же минип алып ойногон учурлар кездешет. Жыйынтыгы жаман болуп калышы ыктымал.
Суу жутпайт. Суу жутуп алган учурда адам дем ала албай чөгүп кетүүсү мүмкүн. Ошондой эле сүзүүгө да дарманы келбей калат. Ошондуктан суу астында сүзгөндө оозду бекем жабууну унутпаңыз.
Көпүрөдөн, тосмодон, кайыктан башы менен тик ылдый сууга секирбейт. Көлдүн түбү кандай экенин билбеген, тааныш эмес жерлерден да абайлабаса, баш-көз жарылып жаракат алып калуу толук мүмкүн. Көл жээгиндеги пирстен секирүүдө дагы этият болуңуз.
Өсүмдүктөр жыш өскөн жерге түшпөйт. Суу алдына мындай чөп-чарлуу жерден да абайлабаса, бутка илинип же оролуп калса адам чыга албай калышы мүмкүн.
Тамакка тоюп алып сууга түшпөйт. Жок дегенде 1-2 саат күтүп туруу керек. Анткени сууга түшүп жатканда адамдын организминде өзгөчө курсак тушта кан айлануу ылдамдайт. Ич түйүлүп, сиңирүү системасына терс таасирин берет.
Моторлуу кайыктан оюн салганга болбойт. Айрым учурда жаш балдар өтүп бара жаткан катерден бири-бирине секирет. Бул да өтө кооптуу көрүнүш. Скутерлерди да 12 жаштан өйдө балдарга гана өз алдынча башкарууга жол берилет. Ошондой эле ал адамдардан алыс жүрүшү керек.
"Сууга чөктүм" деп тамашалап кыйкырбайт. Жакындарыңды минтип коркутпаш керек. Анткени кийичерээк кокустан чындап чөгүп жатсаңыз, сизге эч ким ишенбей, маани бербей коюшу мүмкүн.