БИШКЕК, 24-июл. — Sputnik. Аида Салянованын бир тууганынын өлүмүнө шектелип жаткан үчүнчү адам кармала элек, бирок ал Россияда экени белгилүү. Бул тууралуу ИИМдин Криминалдык милициясынын башчысы Нурбек Абдиев билдирди.
2017-жылдын 6-ноябрга караган түнү болжол менен саат 2.30дарда мурдагы башкы прокурор Аида Салянованын иниси Улан Саляновду өз үйүнөн атып кетишкен.
Ошол эле жылдын 27-декабрында бул кылмышка шектүү катары Бишкектин 31 жаштагы жараны кармалган. Анын жанынан Саляновго ок атылган курал табылган.
Кийин Москва шаарында экинчи шектүү колго түшүрүлгөн.
Абдиевдин айтымында, үчүнчү шектүүнүн аты-жөнү жана Россияда жүргөнү такталган. Ушул тапта аны колго түшүрүү максатында Кыргызстандын жана Россиянын укук коргоочулары иштеп жатат.