БИШКЕК, 28-май — Sputnik. Наристе кыздын мыкаачылык менен сабалганы тартылган видео Перуда тартылган. Бул тууралуу Түштүк Америкадагы окуяларды чагылдырып келген MTO News порталы жазып чыкты.
Акыркы күндөрү кыргыз жана казак сегментине келиндин кичинекей кызды сабап жатканы тууралуу видео тараган. Анда аял наристени ичке тээп, дубалга уруп, бычак шилтейт. Келинди ушунун баарын тасмага тартып жаткан эркек киши токтотуп калат.
MTO News порталы видео майдын башында Перунун Юнгай шаарында тартылганын жазды. Маалыматка ылайык, кыздын ата-энесин милиция кармап кеткен. Бирок алгач ата-эне эч кандай кылмышка шектелген эмес, анткени алар "кызыбыз ооруп, ооруканага бараткан жолдо чарчап калды" деп кайрылышкан. Сурак учурунда гана шек жаралып, өтө тездик менен тарап жаткан видеодон улам кыздын өлүмүнө ата-энесинин тиешеси бар экени аныкталган.
Бул маалыматты кыйыр түрдө Перунун Жогорку сот палатасынын 9-майда Facebook баракчасына жарыяланган билдирүүсү да тастыктады. Сот 19 жаштагы Рамиро Мамани менен 18 жаштагы Диана Каролина Кори Лукени балдарга болгон катаал мамилеси үчүн айыптуу деп тапканы жазылган.
"Жаштар бала оорудан кийин чарчап калганын айтышкан. Аларга сөөктү өлүкканадан алып кетүү боюнча маалымкат берээрде кыздын чоң апасы наристени ата-энеси катуу таяктап, андан кийин желим баштык менен муунтуп салганын айтып берген. Андан тышкары, аял жубайлар коңшу шаарга качып кетүүгө даярданып жатканын да маалымдаган", — деп айтылат билдирүүдө.
Ал арада Кыргызстандын Ички иштери министри видео КРде тартылган деген пикирди четке кага элек. ИИМ расмий маалымат күтүп жатканын билдирди.