Учурда парк "Зеленстрой" ишканасынын балансында турат.
1995-жылы Кыргыз ССРинин 50 жылдыгы атындагы парк Кемаль Ата түрктүн атын алып, түрк лидеринин эстелиги кире беришке орнотулган. Кийинки жылы афган согушунун жоокерлеринин элесине арналган айкел тургузулган.
Азыр көптөрдүн көзүн кызартып, кээ бир тилекелери менчик колго өтүп кетип, ал тургай аймагына беш кабаттуу үй тургузулган парк бишкектиктердин көзгө сүртө турган тумар жайына айланып барат. Бак-дарактар улам суюлуп бара жаткан Бишкекте таза абанын аралы болушу турган иш.
Асмандан тартылган видеодо парктын эки Малдыбаев жана Токтоналиев көчөсү тарабынан акырын жыла парк аймагына кирип, курулуп жаткан үйлөрдү байкоого болот.
Ачык маалыматтарга үңүлсөк, 1994-жылдан тарта парктын аймагы чекесинен кертиле баштаган. Маркум Жумабек Ибраимов Бишкек шаарынын мэри болуп турганда парктын 5 гектарга чукул жерин Кыргыз архитектуралык курулуш институтунун окуу лабораториялык корпусуна (КАСИ) берүү токтому чыккан. Кийин ошол аймакта эмнегедир мечит пайда болду…
1997-жылы Бишкек мэриясынын токтому менен дагы 3,654 га жери КАСИге берилген. Ушул эле жылы 3,48 гектар жер SOS-балдар айылын куруу үчүн бөлүнгөн.
2000-жылы парктын башына каран түн түшкөн учур десек жаңылбайбыз. Медетбек Керимкулов мэр болгон учурда токтом менен үй-бүлөлүк эс алуу тибиндеги үйлөрдү куруу үчүн 0,91 гектар жер "Нарын" ишканасына берилген. Бирок эс алуу үйлөрүнүн ордуна элиталык эки кабаттуу үйлөр түштү… ошентип элдин энчисиндеги жер жеке колго өтүп кетти…
Өкмөттүн токтомуна ылайык, парк өзгөчө коргоого алынган тарыхый-маданий жаратылыш аймактардын катарына киргизилген, бирок ал токтом деле абалга аралжы боло албагандай.
Парктын азыркы аянты тууралуу сурообузга Бишкек башкы архитектурасынан төмөнкүдөй жооп алдык.
"Чектешкен аймактарын так карап, эсептей келгенде аянты 102,79 гектар болуп чыгып, буга чейин айтылып келген 107 гектарга жеткен жок", — деп айтылат аталган ведомство жиберген маалыматта.
Буга чейин көз арткандар көбөйүп бара жаткан Ботаникалык бактын асмандан көрүнүшү жарыяланган.