37 жашында өмүрү кыйылган улуу талант. Жолдубай Кайыпов тууралуу 6 факты

Sputnik Кыргызстан агенттиги улуу таланттын элесине арнап, ал тууралуу фактыларды окурмандарга сунуштайт.

Гүлшан Молдоева: "Арноо концертинен" кетем деп көп ирет түйүнчөгүмдү түйгөм

8 Жалган Куран 2018, 18:37

Айыл чарбадан башталган эмгек жолу. Жолдубай Кайыпов 1946-жылы 11-августта Ат-Башы районунун Жаңы-Күч айылында карапайым үй-бүлөдө жарык дүйнөгө келген. Он баланын улуусу болгондуктан ата-энесине жардам берип, алардын колуна кол, бутуна бут болгон. Музыкага болгон шыгы да кичинекей кезинен эле билине баштаган. Билим алууну эңсеген болочоктогу талант мектепте 8-классты бүтүргөн соң айыл чарба техникумуна тапшырат. 1963-жылы техникумду аяктап, эмгек жолун Ат-Башыдагы "Пограничник" чарбасында зоотехник болуу менен баштайт.

Жайлоодогу махабат. Жаш зоотехниктин болочоктогу жубайы менен болгон махабаты жайлоодон башталган. Экөө эки башка айылдан болгону менен бир колхоздо жашашчу. Экөөнүн тең аталары топоз багып, балдар бош убакыттарын бирге өткөрүшчү. Кечкисин жаштар тоо койнунда ар кандай оюндарды ойношчу. Эки жаштын жылдызы төп келип, жайлоодон башталган сезимдери күчөп Жолдубай менен Жумабүбү баш кошушат.

Орто Азиянын эң мыкты диктору. Кантсе да жүрөгү чыгармачылыкка жакын болгон Жолдубай Кайыпов райондогу маданий иш-чараларга такай катышып обон созчу. Кыялын ишке ашыруу үчүн үй-бүлөсү менен Фрунзеге көчүп келет. Ошол кезде жаңы ачылган Бүбүсара Бейшеналиева атындагы искусство институтунун вокал бөлүмүнө тапшырып, 1970-жылдардын башында Абдылас Малдыбаев атындагы опера жана балет театрында солист катары эмгектенет. 1973-жылы Кыргыз мамлекеттик телерадиокомитетине диктор изделип жаткандыгын угуп, талантын сынап көрүүнү чечет. Өң десе өңү, үн десе үнү бар жигитти баары жактырат. Ал убакта жаш талант болгону 3-курста гана окучу. Ошентип кыргыз элинин назарын өзүнө бурган, улуттук теленин жүзүнө айланган диктор пайда болот. Мунун далили катары 1981-жылы "Орто Азиянын эң мыкты диктору" аталат.

Нандын даамын беш жашымда таткам. Дарика Жалгасынова тууралуу 6 факты

20 Жалган Куран 2018, 12:58

Обончу жана аткаруучу. Жолдубай Кайыпов дээриндеги шык-жөндөмүн өчүргөн эмес. Дикторлук менен бирге ырчылык жана обончулукту кошо алып кеткен. Жетимишке жакын обондун автору. "Мекеним", "Атам менен энеме", "Ала-Тоону сагынам", "Атамды ойлоп", "Жашчылык", "Көл үстүндө", "Алгачкы сүйүү", "Таңкы поезд", "Айтылбай калган махабат", "Кел бийлейли, ырдайлы" сыяктуу ырлары элге кеңири белгилүү. Жолдубай Кайыповдун "Ырлар" аттуу ыр-обондор жыйнагы көзү өткөндөн кийин 1985-жылы жарыкка чыккан.

Атам менен энеме. Жолдубай Кайыповдун чыгармачылыгындагы өзгөчө ролду анын "Атам менен энеме" аттуу ыры ээлейт. Ал азыркы жаш муундун элесинде дал ушул ыры менен калды десек аша чапкан болбойбуз. Ырдын сөзүн белгилүү акын Турар Кожомбердиев жазган. Акынга көптөгөн обондор келип түшкөн. Бирок Кожомбердиев алардын ичинен Жолдубай Кайыповдун вариантын жактырган. Жарыкка чыгаары менен болуп көрбөгөндөй популярдуулукка жеткен ыр азыр да эл сүйгөн чыгармалардын катарында.

Жаш кеткен талант. Улуу талант 1984-жылы болгону 37 жашында мыкаачылардын колунан каза тапкан. Анын жубайы Жумабүбүнүн айтуусунда ошол каргашалуу күнү кечке жуук жолдошу ага чалып, жаңылыктарды окуп бүтөөрү менен балдарын цирктен алып үйгө барарын айткан. Бул жубайлардын акыркы сүйлөшүүсү болгон. Ал түнү балдары үйүнө өзү келген. Түнү менен уктай албай чыккан жубайы эртең менен милициядан Жолдубай Кайыповдун киши колдуу болгондугу тууралуу суук кабарды уккан. Анын артында үч баласы калган.