БИШКЕК, 2-мар. — Sputnik. АКШдан Чеченстанга курал-жаракты ашкана буюмдары деп салып турган деген шек менен кармалган кыргызстандык Теңгиз Сыдыков коомдун көңүлүн бурду. Ал Кыргызстандын Америкадагы мурдагы элчиси Замира Сыдыкованын баласы экени белгилүү болду.
Полиция узак мөөнөттүү тыкыр көзөмөлдөн кийин Сыдыковду чогуу жашаган досу Элдар Резванов менен 27-февралда Вирджиния штатындагы Александрия шаарынан кармаган. Бирок Сыдыковдун энеси Замира Сыдыкова уулу досун полиция кармап кеткендиктен анын абалын билүү үчүн укук коргоо органдарына өзү барганын билдирип, курал-жарактын аткезчилигине тиешеси жок экенин маалымдаган.
Sputnik Кыргызстан агенттиги "көмүскө ишкердик менен алектенген" деп АКШ бийлиги айыптап жаткан Теңгиз Сыдыков ким экенин билип көрүүгө аракет кылды.
Маалыматтар анын LinkedIn тармагындагы баракчасынан алынды. Бул портал колдонуучуларга ишкер чөйрөсү менен ымала курууда бир топ жеңилдик берет.
Ири IT-компанияларында иштеген
Сыдыков кармалганга чейин Dovel Technologies IT-компаниясынын кызматкери болгон. Бул жакка былтыр декабрь айында келген. Мекеме бизнес-менеджмент боюнча аудитордук жана консалтинг кызматын сунуштайт. Ошондой эле маалыматтык технология чөйрөсүндө техникалык камсыздоо менен дагы алектенет.
Ага чейин 2015-жылдан тарта Жорж Вашингтон университетинин инновация жана ишкердик бөлүмүндө долбоордун координатору болуп иштеген. Эки жылдан кийин 2017-жылдын ноябрь айында иштен кеткен.
Андан сырткары, Вашингтондогу Борбор Азиядагы Евразия фондусунун кеңсесине жумушка орношкон. Фондуда 2010-2011-жылдары бухгалтердин ассистенти болгон.
Американын университеттеринде билим алган
Сыдыков LinkedIn сайтындагы маалымат боюнча экономика адистиги боюнча биринчи билимин Вирджиния штатынын Фэрфакс округундагы Жорж Мейсон университетинен 2007-2011-жылдары алган.
2016-жылы Жорж Вашингтон университетинин Бизнес мектебинен дистанциондук түрдө окуган. Аны ийгиликтүү аяктаса 2019-жылы магистр (MBA) даражасы ыйгарылат.
Ыктыярчы
Негизги ишинен сырткары эл аралык ири уюмдарда ыктыярчы болуп иштеген. Дүйнөлүк банк тарабынан уюштурулган Жаштар саммитинде байланыш боюнча ыктыярчы болгон.
Сыдыков, андан сырткары, USAID уюмунун суу ресурстарын коргоо долбоорунда волонтерлукту аркалаган.