БИШКЕК, 11-фев. — Sputnik. Келе жаткан аптада өлкө аймагында маал-маалы менен кар жаашы күтүлүүдө. Бул тууралуу Кыргызгидрометтин 11-февралдан 17-февралга карата аба ырайынын божомолунда айтылды.
Республика аймагында жолдор тайгак болуп, батыштан соккон шамалдын ылдамдыгы секундасына 4-9 метрден, кээ бир райондордо 15-20 метрге жетиши ыктымал.
12-февралда кар жаабайт.
13-февраль күнү күндүз кээ бир тоолуу райондордо бир аз кар жаайт. Жолдор тоңуп, тайгак болот.
15-февраль күнү Ош, Жалал-Абад жана Баткен облустарынын айрым жерлеринде кар катуу жаайт. Ал эми өлкөнүн түндүгүндө абанын температурасы нөлдөн бир градуска чейин жылуу болору айтылды. Болгону Нарын облусунда күндүзү 4…9 градус суук болот.
17-февралда кар, тескерисинче, түндүк аймактарга өтөт. Ысык-Көл менен Нарын облустарынын айрым жерлеринде кар жаап, абанын температурасы төмөндөйт.
Аптанын биринчи жарымында борбор калаада жана Ош шаарында жаан-чачын күтүлбөйт. Батыштан соккон шамалдын ылдамдыгы секундасына 2-7 метрге жетиши мүмкүн.