БИШКЕК, 27-янв. — Sputnik. Бишкек ТЭЦтеги көйгөй азырынча жоюла элек. Бул тууралуу "Электр станциялары" ишканасынын маалымат катчысы Тагжана Айдаралиева социалдык тармакка жазып чыкты.
Жарандар Sputnik Кыргызстан агенттигинин Telegram тиркемесиндеги "Бишкек сегодня" тобуна нааразычылыктарын билдиришүүдө. Көбүнчө 10-11-кичи райондордун жана "Чыгыш-5" кичи районунун айрым борбордук көчөлөрүндөгү көп кабаттуу үйлөрдүн тургундары батирлери суук болуп жатканын айтышууда.
Ведомствонун маалымат кызматы билдиргендей, 27-январь күнү эртең менен техникалык көйгөйлөр жоюлган эмес.
"Электр кубаттуулугу 180 МВт. Адистер кечээ саат 18.00дөн тарта көйгөйдү жоюнун үстүндө иштеп жатышат. ГЭСтен иштелип чыккан электр энергиясы өлкөнүн түндүк тарабын толук камсыздаган. Учурда Бишкектеги жылуулук маселеси чечилүүдө", — деп ишканадан билдиришти.
Кечээ, 26-январда компания жылуулук тармагын бир нече сааттын ичинде өз калыбына келтирерин маалымдаган.