БИШКЕК, 25-янв. — Sputnik. Вице-премьер Темир Жумакадыров каза болгон жол кырсыгы боюнча айыпталып жаткан Афтандил Таалайбек уулу биринчи сот отурумунда эле күнөөсүн моюнга алды. Бул тууралуу Sputnik Кыргызстан агенттигинин кабарчысы сот залынан билдирди.
Иш Москва райондук сотунда каралды. Буга чейин ИИМдин башкы тергөө башкармалыгы ишти иликтеп, материалдарды 8-январда сотко өткөрүп берген болчу.
Айыпталуучунун айтымында, ал "Е" категориясындагы айдоочулук күбөлүктү жол кырсыгы болгонго чейин төрт ай мурда алган.
"Ошол күнү эртең менен байкем болуп Бишкекке чыкканбыз. Жолдон "Жигулини" ашып өтүү үчүн каршы тилкеге чыккам. Алыстан жолтандабас келе жатканын көрдүм. Ага фараны бир нече жолу күйгүздүм, бирок кеч болуп калды. Четке чыгууга аракет кылганда ал дагы ошол жакты көздөй айдады. Ошентип жол кырсыгына кабылдык", — деди Таалайбек уулу.
Окуянын күбөсү катары айыпталуучунун тууганы Бекназар Шаршембиев дагы суралды. Жол кырсыгы болгон учурда ал КамАЗдын ичинде болгон.
"Жолдо уктап калыпмын. Кырсык болгондон кийин бутум кабинага кыпчылып калыптыр. Ооруканага алып кетишти", — деди Шаршембиев.
Тараптарды уккан сот кийинки отурум 30-январда болорун билдирди.
Вице-премьердин өмүрүн алган жол кырсыгы боюнча ишти судья Нурлан Ажыбеков карап жатат.
Жумакадыров өткөн жылдын 7-октябрь күнү Москва районунун Садовое айылында жол кырсыгынан улам көз жумган. Ал кырсыктан вице-премьердин жардамчысы жана айдоочусу да каза тапкан.
Кийин Жумакадыров бара жаткан жолтандабас менен сүзүшкөн КамАЗ унаасынын айдоочусу камакка алынган.