БИШКЕК, 6-окт. — Sputnik. Россия чек арасын жаап, авиакаттамдардын санын кайрадан кыскартууну пландаган жок. Бул тууралуу COVID-19га каршы күрөшүү боюнча ыкчам штабга шилтеме берип РИА Новости жазды.
Буга чейин бир катар ЖМКлар Россия коронавирустун күчөп бара жатканына байланыштуу чек арасын жаап, сырттан киргендер боюнча чектөөлөрдү киргизгенин жазышкан.
"Ыкчам штаб чек араны жаап, аба каттамдарын кыскартууну пландаган эмес", — деп айтылат билдирүүдө.
Белгилей кетсек, дүйнөнүн башка өлкөлөрү сыяктуу эле Россияда дагы коронавирус күчөп бара жатат. Ушул тапта РФте вирус 0,9 пайызга өскөнү айтылууда. Дүйшөмбү күнү өлкө боюнча 10 888 киши COVID жуктуруп алганы аныкталган.
Ал эми дүйнө жүзү боюнча коронавирус жугузгандардын саны 5-октябрь күнү 35 миллиондон ашты.
