Психолог: балага корккон нерсесин жомок аркылуу жеткирсе болот
19:21 09.01.2021 (Жаңыртылды: 14:27 14.12.2021)
© Sputnik
Жазылуу
"Данакер" үй-бүлөнү бекемдөө борборунун психологу Нуриза Батырбекова үй-бүлөдө бир туугандардын ортосундагы мамилени бекемдөөгө ата-энелердин ролу чоң экенин айтты.
Бардык эле балдар өзгөчө кичинекей кезинде бир нерселерден коркушат. Мисалы, балаңыз жалгыз калгандан же караңгыдан чочулашы мүмкүн. Мындай учурда ал корккон нерсе коопсуз экенин жомок аркылуу түшүндүрүп койсоңуз болот. Бул тууралуу Нуриза Батырбекова Sputnik Кыргызстан радиосунун эфиринде маек куруп жатып билдирди.
Психолог: балага корккон нерсесин жомок аркылуу жеткирсе болот
Анын айтымында, бөбөктөр өзгөчө алты жашына чейин көргөн мультфильм, кинолордогу каармандарын түз кабыл алып, жашоодо да туураганга жөндөмдүү келишет. Мындай учурда ал каарман оң же терс экенин ата-эне түшүндүрүшү зарыл.
"Балдар чоң кишилерге караганда көргөн нерсесине катуу таасирленишет. Алар критикалык ой жүгүртө албагандыктан, бардык нерсени түз кабыл алышат. Ошондуктан өзү көргөн мультфильм же тасмадагы бир терс каарманды туурап, ал сүйлөгөн сөздөрдү кайталап, бир туугандарын уруп, чаап, тээп ойношу мүмкүн. Мындай учурда ата-эне баланы урушпай, жасап жаткан нерселери туура эмес экенин түшүндүрүшү керек. Ошол эле учурда улуураак бир туугандары бөбөгү кайсы бир каарманга ишенгени үчүн аны шылдыңдап коюшу мүмкүн. Мындайда улуу балдарыңыз менен биргеликте кичүү бир тууганына белек жасап же башка бир кам көрүү аракеттерин үйрөтүү зарыл. Негизи эле ата-энелер балдары жактырган тасмаларды чогуу көрүп, окуган китептерин биргеликте тандаганы жакшы. Ал эми чүрпөлөрүңүз менен биргеликте кол эмгек саатын өткөрүп туруу балдарга эмоционалдык жакшы сезимдерди чакырып, анын күйүмдүү бала болуп чоңоюшуна, бир туугандардын ынтымагын бекемдөөгө шарт түзөт", — деди Батырбекова.
Психолог балдар менен чогуу мультфильм көрүп же жомок окуганда алар менен окуяны талдап, аналитикалык ой-жүгүртүүгө үйрөтүү зарылдыгын кошумчалады.
