Мамбеткулов: Москвадагы кыргыздардын башын бириктирген долбоорлор бар
Россиядагы мекендештерибиздин башын бириктирип, жумуштан сырткары жакшы иштер менен алектенүүсү үчүн бир катар коомдук уюмдарды түзүп, спорттук мелдештерди уюштурдук. Бул тууралуу Максатбек Мамбеткулов Sputnik Кыргызстан радиосунун "Стимул" программасында маек куруп жатып билдирди.
Анын айтымында, Россияда жаштардын билим алуусу жана ишкерлик менен алектенүүсү үчүн абдан жакшы шарт түзүлгөн.
"Учурда мен жеке ишкермин. Негизги багытым сырттан кездеме алып келип тигүүчү цехтерди, мини фабрикаларды текстиль менен камсыз кылуу. Жумуштан сырткары Москвада кыргызстандык мекендештерибиз көп болгондуктан алардын башын бириктирүү максатында көптөгөн спорттук долбоорлорду өткөрүп келебиз. Алсак, KG Лига деп футбол боюнча мелдеш дайыма өтөт. Анда бир гана кыргызстандыктар эле эмес, Москва, Африка, Молдова, Тажикстан, Өзбекстандан келгендер ойношот. Мында 100 команда катталган. Андан сырткары, ушундай эле волейбол боюнча лига бар. Анда кыз-келиндер көбүрөөк ойношот. Ошону менен бирге Кыргыз күрөшү боюнча федерация негиздедик. Жылына бир-эки жолу мелдеш өткөрүп турабыз. Ошондой эле эки чоң социалдык долбоорубузду ишке ашырып жатабыз. Анын бирөөсү ДЭМх деп аталып, Кыргызстанда ийгиликке жеткен адамдар менен бул жактагы кыргызстандыктарды жолугуштуруп, эркин сүйлөшүү аянтчасын түзүп берүү", — деди Мамбеткулов.
Ал 20-30дай кишиден турган жамаат кайрымдуулук фондун түзүп, ай сайын мекенибиздин ар кайсы облусунда жашаган аз камсыз болгон үй-бүлөлөрдү азык-түлүк менен камсыздап турушарын кошумчалады.
