Кудайкулов: буудайдын кошумча нарк салыгы алынса ун арзандайт
Буудайды импорттоодо кошумча нарк салыгы 50 пайызга төмөндөп же такыр эле алып салынса ундун баасы да түшөт. Бул тууралуу Кубанычбек Кудайкулов Sputnik Кыргызстан радиосунун таңкы эфиринде маек куруп жатып билдирди.
Анын айтымында, буудайдын эң башкы экспортеру болгон Казакстандын эгин талааларында быйыл түшүм начар болуп, анын кесепетинен Кыргызстанда ундун баасы кымбаттап жатат.
"Казакстан жыл сайын 20 миллион тоннадан ашык буудай топтоп, экспортко чыгарчу. Быйыл аба ырайынын ысык болгондугуна байланыштуу эгин талааларында түшүм начар чыгып, 17-18 миллион тонна буудай чогултушту. Бул түздөн-түз баага таасирин тийгизип, анын өсүшүнө алып келип жатат. Мисалы, былтыр бир килограмм буудайды 12 сомдон алсак, бул жылы 16-18 сомдон сатып алуудабыз. Мындан улам ундун баасы да жогору болуп жатат. Мамлекеттик колдоо керек. Эгер ундун баасын төмөндөтөбүз десек, анда буудайды импорт кылууда алынган кошумча нарк салыгын убактылуу 50 пайызга түшүрүп же такыр эле алып салуу керек. Анткени ишкерлер буудайды коңшу өлкөдөн алып келип жатканда транспорттук чыгымга ар бир килограмм үчүн 2 сом төлөшөт жана кошумча нарк салыгына да 2,50 сом беришет", — деди Кудайкулов.
Ошондой эле ал жергиликтүү буудайдын сапаты төмөн болгондуктан Кыргызстанда эгин талааларын иштеткен дыйкандар аз экенин кошумчалады.
