Кыргызстандагы музыкалык окуу жайлардагы аспаптардын эскилиги жетти. Бул тууралуу Жетиген Чалапинов Sputnik Кыргызстан радиосунун таңкы эфиринде маек куруп жатып билдирди.
Анын айтымында, студенттердин окууга болгон кызыгуусуна музыкалык аспаптардын тийгизген таасири зор.
"Бизде эле эмес, башка окуу жайларда да музыкалык аспаптардын эскилиги жетти. Бул маданият үчүн чоң көйгөй. Замандын талабына ылайык, окутуу усулдарынан артта калып жатабыз. Музыкалык окуу жайларда окуган студенттердин колунда барлары өздөрү аспап сатып алып, аны достору менен чогуу колдонгон учурлар кездешет. Албетте, студенттердин баарынын эле өз алдынча аспап сатып алууга чамасы жете бербейт. Анын үстүнө аларды чет өлкөдөн алдырууга туура келет. Музыкалык окуу жайлардагы аспаптарды жаңыртууга мамлекет көңүл бурбай жатат", — деди мугалим.
Чалапинов маданият кызматкерлеринин айлыгынын 80 пайызга жогорулашы аларга шык бергенин кошумчалады.
