БИШКЕК, 1-апр. — Sputnik. Кыргызстандын кээ бир аймактарында 4-6-апрель күндөрү нөшөрлөп жаан жаап, тоолуу райондорго кар түшөт. Бул тууралуу Кыргызгидрометтен кабарлашты.
Билдирмеге караганда, Чүй, Талас, Ош, Жалал-Абад, Баткен облустарынын кээ бир райондорунда жана Ысык-Көл облусунун чыгышында жаан-чачын катуу жаашы күтүлөт.
Бийик тоолуу райондордо жолдор тайгак жана тоңголок болот. Батыштан соккон шамалдын ылдамдыгы секундасына 15-20 метрге жетет. Абанын температурасы бир аз төмөндөйт.
Ошондой эле күтүлүп жаткан жаан-чачынга байланыштуу Бишкек — Ош автоунаа жолунун 121-138 чакырымдарында (Төө-Ашуу ашуусу), 198-265-чакырымдарында (Ала-Бел ашуусу, Чычкан капчыгайы), Ала-Бука — Каныш-Кыя автоунаа жолунун 72-74-чакырымдарында (Чапчыма ашуусу) Мырза-Аке — Кара-Кулжа — Алайкуу автоунаа жолунун 80-130-чакырымдарында, Казарман — Актал-Чат жолунун 43-44-чакырымдарында (Ийри-Суу участкасы), Каракол — Эңилчек жолунун (Чоң-Ашуу ашуусу) 45-92-чакырымдарында кар көчкү түшүү коркунучу сакталат.
Жолдордун айрым жерлери тайгак болуп муз тоңот. Унаалардын ортосундагы 500 метр аралык сакталышы зарыл.
