Социалдык өнүгүү министрлигинин берген маалыматка караганда 40 жашка чыга электе 7ден көп бала төрөгөн жаш баатыр эненин саны ар бир облуста аз дегенде 20дан кем эмес. Аялдардын эл аралык күнүнө карата Sputnik Кыргызстан өлкөнүн ар кайсы аймактарындагы кырктын кырындагы баатыр энелерди тизмектеди.
39 жашында 10-ымыркайын төрөө алдында турган Мадианна Дарбекова
Жаш баатыр энелердин сап башында Чүй облусунун Люксембург айылынын тургуну Мадиана Дарбекова турду. Ал 39 жашында тогуз баланын бактылуу энеси болуп, бир-эки айдан кийин онунчу баласын төрөмүкчү. Улуу кызын 19 жашында төрөгөн баатыр эненин алты кыз, үч эркек уулу бар. Алты баласы мектепке барса, улуу кызы студент. Бирок 40 жашында 10 баланын энеси болуунун алдында турган айым ушул күнгө чейин "Баатыр эне" наамын ала элек.
37 жашында сегизинчи баласын көргөн орус кызы Светлана
Жети-Өгүз районунун Конкино айылынын тургуну орус улутундагы Светлана Ребрикова кыргыз мырзасы Сабыр Байсеркеевге турмушка чыгып, жубайлар төрт кыз, төрт уулдун ата-энеси болушкан. 37 жашында сегиз баланын энеси болгон Светанын тун уулу 18 жашта болсо, кичүүсүсү жаңы төрөлдү. Аталган үй-бүлөнүн жашоо шарты орто. Жолдошу Сабыр мал чарба, дыйканчылык менен алектенип үй-бүлөсүн багат. Учурда бул үй-бүлө турак жайы жок болгондуктан Конкино айылында батирде турушат.
34 жашында "Баатыр эне" наамын алган ак-талаалык Жеңишгүл Букарбаева
Нарын облусунун Ак-Талаа районунун Баетово айылынын тургуну Жеңишгүл Букарбаева 34 жашында жети балалуу болуп, "Баатыр эне" наамын алган. Беш кыз, эки эгиз уулдун энеси 22 жылдан бери Ак-Талаа аймактык ооруканасынын жандандыруу бөлүмүндө иштейт. Жолдошу Рустам 50 жашта. Бактылуу ата-эненин эки кызы студент болсо, калган балдары мектепке барат. Айтмакчы, Букарбаеванын өзүнүн апасы да баатыр эне.
39 жашында жети балалуу болгон Гүлзат Жаңыбаева
Ысык-Көл облусунун Барскоон айылынын тургуну Гүлзат Жаңыбаева 39 жашта жети баланын бактылуу энеси болгон. Улуу кызы 21 жаштагы Алтынай Бишкек шаарындагы жогорку окуу жайлардын биринде студент. Андан тышкары, үч кыз, үч эркек баласы бар. Жолдошу Таалай Касымов мал чарбачылыгы менен алектенсе, Гүлзат мектепте ашпозчу. "Баатыр эне" наамы бар.
36 жашында сегиз балалуу болгон жалал-абаддык Дамира Озокеева
Жалал-Абад облусунун Аксы районунун Кечүү айылындагы Базарбай Алыбаевдин жубайы Дамира Озокеева 35 жашында сегиз баланын бактылуу энеси болгон. Учурда алты кыз, эки эркеги бар. Балдарынын ортосу эки жаштан. Жашоо шарты эл катарында деген бүлө мал чарбачылыгы менен алектенет. Баатыр эне окууну аяктап студент болгон улуу кызы Бурулайдан башкасына 800 сомдон жөлөк пул акча алат. "Баатыр эне" наамын алган.
