БИШКЕК, 3-мар. — Sputnik. Өлкө аймагында жакшылык-жамандыкка канча насыя алынарын БУУнун калкты жайгаштыруу фонду эсептеп чыкты. Андагы маалыматка караганда, алынган жыйырма насыянын бирөө тойго сарпталат.
Бул багытта насыя алгандардын сап башында Ош шаары турат. Анда ар бир алтынчы насыя жамандык менен жакшылыктарга жумшалат экен. Ал эми жалпы Ош облусун алганда бул көрсөткүч үч пайызды гана түзүп, өлкө боюнча эң төмөнкү көрсөткүч болуп эсептелет.
Ал эми эркектер арасында насыя алгандардын көбү 70 жаштан ашып калгандар — алар алган ар бир онунчу насыя тойлорго сарпталган.
Фонддун маалыматына караганда, кыргызстандыктардын көбү насыяны бизнеске жумшоо үчүн алышат. Каражаттын 34 пайызы ушул багытка жумшалат. Ар бир төртүнчү насыя үй курууга жана ремонт иштерине керектелет. Ал эми ар бир сегизинчи насыя үй эмеректери, кийим жана турмуш-тиричилик техникасы үчүн алынат.
