БИШКЕК, 6-окт. — Sputnik. Кыргызстандын кайсы аймагында канча бала төрөлүп жатканы тууралуу маалыматты Улуттук статистикалык комитет таратты. Маалыматтардын негизинде Sputnik агенттиги өлкөнүн "эң көп балалуу" облустарынын рейтингин түзүп чыкты.
- Ош облусу. 1000 тургунга 25 ымыркай туура келет. Башкача айтканда, сегиз айда 17 миң ымыркай жарык дүйнөгө келген. Статистикалык маалыматка ылайык, аталган аймакта төрөлгөн балдардын үч пайызы гана керектүү салмактан кем төрөлгөн. Бул республика боюнча эң төмөнкү көрсөткүч.
Баткен облусу. 1000 кишиге 25 ымыркай туура келет. Улуттук статистикалык комитеттин маалыматына ылайык, үч жашка чейинки ымыркайлар керек болгон белокту эки эсе аз алышат. Ымыркайлардын салмак кошуусу да аталган аймакта эң жогору. 100 ымыркайдын 12си гана өзүнүн салмагына жетпейт.
Жалал-Абад облусу. 1000 кишиге 21 ымыркай туура келет. Сегиз айда бул аймакта 14 миң ымыркай төрөлгөн. Бул аймактагы балдар тийиштүү көлөмдө май жана белокторду жебейт. Бирок, өз жашына салмагы туура келбегендердин саны өлкө боюнча алып караганда эки эсе аз.
Бишкек шаары, Ош жана Талас облусу. Бул аймактарда төрөлгөндөрдүн саны бирдей. 1000 кишиге 20 ымыркай туура келет. Статистикалык маалыматтарга ылайык, Таластагы ымыркайлар жакшы тамактанат. Себеби, керектүү салмак албай калгандардын саны аз.
Чүй облусу. 1000 кишиге 17 ымыркай туура келет. Бул аймакта да үч жашка чейинки балдар да начар тамактанып, белок жана май жетишпейт. Андыктан 10 баланын бирөө керектүү салмак ала албайт.
Ысык-Көл облусу. 1000 тургунга 16 ымыркай туура келет. Ал жакта 4 миңге жетпеген ымыркай жарык дүйнөгө келген. Статистикалык маалыматтар боюнча көлдүк ымыркайлар да начар тамактанышат.
Нарын облусу. 1000 кишиге 14 ымыркай туура келет. Облус боюнча болгону 2,5 миң ымыркай төрөлгөн. Балдардын тамактануусу боюнча да бул аймак акыркы орунда турат.
