Айсулуу — чыгармачыл адам, чет өлкөдөн көйнөк алмайынча келбейт, бийик такалуу бут кийимдин күйөрманы жана да мыкты спортчу. Журналист Гүлдана Талантбекова Тыныбекованын карьерасынан тыш фактыларды чогултуп көрдү.
Жалал-Абадда төрөлгөн кочкорлук кыз
Айсулуу Тыныбекова 1993-жылы 4-майда Жалал-Абад облусунун Майлуу-Суу шаарында төрөлгөн. Нарын облусундагы Кочкор районунун Теңдик айылында өсүп чоңойгон. Ата-энеси медицина кызматкерлери. Өзүнөн улуу эки эжеси, агасы жана иниси бар.
Жолдо жүрүп бүтүргөн мектеп
Бала кезинде кыздарга караганда балдарга жакын өскөн. Тийишкен балдардан сөзсүз өч алчу. 9-класста окуп жүргөндө Кочкордо таэквондо менен машыга баштап, улуу муундагы кишилерден биринчи жолу "кыз башы менен үйдө эле отурбайбы" деген сөздөрдү уккан. Мектепте жакшы окуган окуучулардын катарын толуктап, классташтары менен отурушка, кечелерге көп барган эмес. 10-классты бүткөндө күрөш менен машыгып борборго бат-баттан каттагандыктан, мектепти Бишкек — Кочкор жолунда аяктаган.
Кара күчкө салынган чемпиондук
Атактуулукка алдырбаган жан дүйнө
Айсулуу спортто ийгиликтерди багынта баштагандан бери аты алыска тарады. Ал бул тууралуу "өзүм менен өзүм калганда кандай болсом, коомчулук алдында да ошондоймун. Негизи атактуулук менин жан дүйнөмдү эмес, баскан-турганымды өзгөрттү. Мен кечээ кандай болсом, бүгүн да ошондоймун, эртең да ошол бойдон калам" деп айтканы бар.
Тамакка болгон табит, ашканага болгон мамиле
Айсулуу мекени Кыргызстан башка өлкөлөрдөн абасы, суусу менен айырмаланат деп эсептейт. Чет өлкөгө чыгарда дайыма жарма, нан, кукси, алма салып алат. Себеби чет жерде табити такыр жоголуп кетет экен.
2010-жылдан бери үй жумуштарын жыйыштырып койгон. Анткени андан улуу, бийик максаттарым бар деп эсептейт. Майда иштерди кылбай калдым деп кейибейт деле. Себеби спортту тандап кеткен жылдарга чейин эшиктин да, үйдүн да жумушун кылып, талаа иштерин да жасачу. Спортчунун "бардык жумушту бүтөргөндөн кийин кечинде көчөнү чаң ызгыта ойногонго да жетишчүмүн" деп айтканы бар.
Чыгармачыл спортчу
Жалгыз калганда күндөлүгүн ачып, сырларын төгөт. Ой-кыялдарын, максаттарын жазат. Көркөм адабиятка кызыгып, бош убактысында китеп окуйт. Мындан сырткары, кубанганда же кайгырганда кагаз бетин чиймелеп ыр жазып, сүрөт тартат.
Кийим тууралуу
Медициналык кароодон өтүп турат
Айсулуу спортто майда-чүйдө кокустуктар боло берет, алардын ар бирине арызданып олтурсаң, максатыңа жете албайсың деп эсептейт. Жараткандан ден соолук сурап, эки айда бир ички органдарын, башын текшертип толук медициналык текшерүүдөн өтүп турат. Болбосо майда жарааттар топтоло берип кийин чоң оору пайда кылышы мүмкүн деп, спорттун өзү сактыкты талап кылаарын белгилейт.
Азырынча мырзалар тууралуу ойлонбойт
Тыныбекова 2016-жылы болуп өткөн жайкы олимпиада оюндарынан кийинки бир маегинде "сезимдерин билдирип, "жообуңду бер" деп жүргөн мырзалар бар. Бирок мен алдыдагы беш жылды бир гана спортко арнайм. Олимпиада оюндарында ийгиликке жетишмейинче бүлө куруу тууралуу ойлобошум керек. Муну бардык спортчу кыялданат. Дээрлик бош убактым жок машыкканым да ошондон" деген.
Жетишкендиктери
- 2010-жылы аялдар күрөшү боюнча Азия чемпионатында коло медаль утуп, жаштар арасында Азиянын чемпиону болгон;
- 2012-жылы Лондон Олимпиадасынын катышуучусу. Эл аралык турнирлерде бир нече жолу утушка жетишкен;
- 2013-жылы Азия чемпионатынын коло медалынын ээси. Казань шаарында өткөн Дүйнөлүк студенттик олимпиадада коло медалга татыган;
- 2014-жылы Түштүк Кореянын Инчхон шаарында өткөн XIV Азия оюндарынын коло медалын алган;
- 2015-жылы Россияда өткөн Олимпиада чемпиону Иван Ярыгин мелдешинин күмүш байгесин алган;
- 2014-2015-жылдары Азия чемпионатынын күмүш медалына ээ болгон;
- 2016-жылы Таиланддын борбору Бангкок шаарында өткөн Азия чемпионатында күмүш медалга ээ болгон;
- 2016-жылы өткөрүлгөн жайкы Олимпиада оюндарынын катышуучусу;
- Швецияда өткөн Klippan Lady Open 2017 турниринде жараатына карабай күмүш медаль тагынып, дүйнөдөгү алдыңкы беш спортчунун төртүнчүсү деп аныкталган. Машыктыруучулары — КРдин эмгек сиңирген машыктыруучусу Нурбек Изабеков жана Түгөлбай Базакечов.
