БИШКЕК, 16-янв. — Sputnik. "Манас" аэропортуна жакын жердеги Дача-Суу айылына кулап түшкөн учак заманбап аба кемелеринин катарын толуктарын көп жылдан бери бортинженер болуп эмгектенген Үрүстөм Жусупбеков Sputnik Кыргызстан агенттигине билдирди.
Жусупбеков учактын кыйрашына аба ырайы, же учактын техникалык мүчүлүштүктөрү себеп болушу мүмкүндүгүн айтты.
"Boeing 747 үлгүсүндөгү учактар абдан заманбап учак. Аны автопилотко коюп койсо өзү деле конгонго жөндөмдүү. Кырсыкка учактын бузуктугу же учкучтардын тиешеси болушу ыктымал. Айрымдары учуп-конуу тилкесин жакшы байкабай калышы мүмкүн. Менин пикиримде, кырсыкка болушуна аба ырайынын шарты да таасир берсе керек", — деди Жусупбеков.
Ал ошондой эле кырсыктын келип чыгуу себебин атайын түзүлгөн комиссия аныктап чыгарын кошумчалап, азыркы заманбап учактардагы атайын система автопилоттук түрдө учакты жерге кондурууга жөндөмдүү экенин баса белгиледи.
