Картондо уктаган үч жашар Исхак бала бакчага бара баштады

БИШКЕК, 14-окт. — Sputnik. Картондо уктап, коомчулукта бир топ талкуу жараткан үч жашар Исхак бала бакчага барып, октябрь айынан баштап жөлөк пул ала баштады. Бул тууралуу Sputnik Кыргызстан агенттигинин аймактык кабарчысына Кара-Суу райондук социалдык өнүктүрүү башкармалыгынын башчысы Куттубек Абдылдаев билдирди.

Эскерте кетсек, буга чейин соцтармакта Ош облусундагы болжол менен Кара-Суу базарында картондун үстүндө уктап жаткан баланын сүрөтү талкууга алынган. Кийинчерээк баланын аты Ихсак экени, апасы Зулфия Үсөнованын төрт баласы бар экени аныкталган. Мындан сырткары, үй-бүлөнүн жашаган жери жана документтери жок болгону белгилүү болгон. 

Окуя президентке чейин жетип, өлкө башчы аталган үй-бүлөнү турак жай менен камсыздоо тапшырмасын берген.

"Исхактын апасы Зульфия Үсөновага Мамелкеттик каттоо кызматы тарабынан паспорт берилди. Ал эми анын төрт баласы туулгандыгы тууралуу күбөлүк алышты. Мындан тышкары, райондук социалдык фонд тарабынан 810 сомдон жөлөк пул чөгөрүлүп, ай сайын үй-бүлө 3240 сом алып турмай болду", — деди Абдылдаев.

Буга чейин аталган үй-бүлөгө өкмөт тарабынан да материалдык жардам көрсөтүлгөн.