БИШКЕК, 18-сен. — Sputnik. Социалдык тармактарда катуу талкууга алынган картондо уктап жаткан баланын үй-бүлөсүнө жардам берилди. Бул тууралуу Sputnik Кыргызстан агенттигине Ош облусундагы ыйгарым укуктуу өкүлчүлүктүн маалымат катчысы Жумамидин Сулайманкулов билдирди.
Буга чейин соцтармакта Ош облусундагы болжол менен Кара-Суу базарында картондун үстүндө уктап жаткан баланын сүрөтү талкууга алынган.
Sputnik Кыргызстан агенттигинин кабарчысы баланын үй-бүлөсүн тапканда, алар турмуштун оор сыноосуна кабылганы белгилүү болду. Баланын аты Исхак, ал үч жашта. Анын 35 жаштагы энеси Зульфия балдарын уктатып коюп базарда иштеп жаткан.
Сулайманкуловдун айтымында, өкмөттүн Оштогу ыйгарым укуктуу өкүлү менен Кара-Суу районунун жетекчилиги 10 миң сомдон каражат чыгарып, балдарга тамак-аш менен кийим —ече сатып беришкен.
"Алардын жылуу кийимдери жок экен. Батирден аларды эч ким кубалаган эмес. Үйдү сатууга туура келгендиктен чыгарышыптыр. Кичинекей Исхак энеси Кара-Суу базарында иштеп жаткан маалда картондун үстүнө уктап калган. Зульфиянын паспорту жок экени белгилүү болду. Жоготуп алдым дейт. Балдарынын дагы күбөлүктөрү жок экен", — деп билдирди Сулайманкулов.
Маалымат катчы белгилегендей документ маселеси чечилгенден кийин жалгыз бой аял жумушка орноштурулуп, балдар бала бакчага киргизилет. Азырынча аталган үй-бүлө мурунку эле үйүндө жашап жатат. Кара-Суу райондук администрациясы турак жай маселесин чечүүгө жардам бермекчи.
