Кызды куткарам деп өзү чөгүп кеткен Исмаевдин жубайы көз жарды

© flickr.com / Quinn DombrowskiЫмыркайдын колу. Архив
Ымыркайдын колу. Архив - Sputnik Кыргызстан
Жазылуу
Эрдик көрсөтүп каза болгон Памир Исмаевдин жубайы кыз төрөп, ымыркайдын ысымын атасыныкында уйкаштырып Пальмира койду.

БИШКЕК, 13-окт. — Sputnik. Мүмкүнчүлүгү чектелген кызды куткарып, өзү чөгүп кеткен Памир Исмаевдин жубайы көз жарып, кыздуу болгонун энеси Уулкыз Апсатарова билдирди.

Буга чейин Исмаевдин жесири Бегимай Козубекованын кош бойлуу экени, жолдошу каза болгондон кийин төрт баланы тарбиялап жатканы айтылган.

"Келиним 7-октябрда төрөдү. Атын Пальмира деп койдук. Азыр эне-бала үйдө, абалдары жакшы", — деди Апсатарова.

Анын айтымында, Пальмиранын кулагы жакшы угат, ден соолугу өз жайында.

Премьер-министр Темир Сариев майып кызды куткарам деп чөгүп кеткен Исмаевдин үйүнө барды
Бегимай Козубекова каза болгон жолдошундай эле кулагы укпаган майып. Памир көчөдө концеляриялык майда-барат буюм сатып үй-бүлөсүн бакчу. 

Кырсык 17-августта Ысык-Көлдүн Григорьевка айылында болгон. Көл жээгинде майып кыздын сууга чөгүп жатканын көрүп 29 жаштагы Бишкек шаарынын тургуну Памир Исмаев жардам берүүгө шашылган. Кызды куткарып, өзү чөгүп кеткен Памирдин сөөгү сегиз күндөн кийин табылган.

Исмаевдин үй-бүлөсүнө парламенттин төрагасынын, премьер-министрдин фондунан жана Темир Сариевдин жеке өзүнүн атынан материалдык жардам көрсөтүлгөн. Мындан тышкары, кайдыгер карабаган жөнөкөй адамдар да каражат чогултушкан. Чогулган акчанын жалпы суммасы 350 миң сомду түздү.

Жаңылыктар түрмөгү
0