БИШКЕК, 27-авг. — Sputnik. Билим берүү жана илим министри Элвира Сариева Бишкектин мэри Кубанычбек Кулматовго мектептерге жалпы форманы киргизүү боюнча чыгып жаткан маселени карап, тартипке келтирүүнү өтүндү. Бул туурасында аталган министрликтин маалымат кызматы билдирди.
Министр мектеп формасы боюнча ата-энелерден арыздар түшүп жаткандыгын айткан.
Буга чейин кочкул кызыл пиджак, ошондой эле көк, кара, боз, ак/кара өңдөр, чакмак кездеме сыяктуу форманын түрлөрүн 10-сентябрга чейин мектеп жана ата-энелер комитети өз алдынча тандай алары билдирилген.
Буга чейин министрлик мектептин аймагында окуучулардын формасын сатууга тыюу салган.
"Мектеп администрациясы ата-энелер менен окуучуларга кайсы бир форманын түрүн алардын макулдугусуз таңуулаганга акысы жок. Өкмөт бир эле түр эмес, мектеп формасынын жалпы стандартын бекитти. Мектепке, зарылдыгына карап жалпы стандартка туура келген жана талап кылынган, тиешелүү бир нече варианттарды киргизгилет", — деп белгиледи министр.
Бишкек шаарындагы мектептер мэрияга карайт. Министрликте мектеп формасы жана ал боюнча чыккан өкмөттүн токтомунун аткарылышын көзөмөлдөгөн атайын комиссия түзүлгөн. Мектеп формасына байланыштуу кандайдыр бир маселелер чыкса, министрлик surookg@gmail.com электрондук дарегине жазууну сунуштайт.
Кыргызстандык окуучуну мектепке даярдоо канча турат Sputnik инфографикасында көрө аласыздар>>
