БИШКЕК, 25-май — Sputnik. Чүй облусунун ИИБдин тергөө бөлүмү эки өспүрүм кызды зордуктоо фактысы боюнча комиссиялык сот-медициналык экспертиза жүргүзүүнү дайындаганы жөнүндө акыйкатчынын маалымат кызматы билдирет.
Саламаттык сактоо министрлиги тарабынан атайын жумушчу комиссия түзүлүп, жабыр тарткан эки өспүрүм кыздын стационардык дарылоодон чыгып кетишине жол берген дарыгерлердин иш-аракеттеринин мыйзамдуулугу текшерилип жатат.
"Комиссиянын иш натыйжалары боюнча медициналык ката кетирген дарыгерлерге карата кылмыш ишин козгоо маселеси каралат", — деп айтылат билдирүүдө.
Окуя боюнча тергөөнү өкмөт башчысы Темир Сариев, ички иштер министри жана акыйкатчы жеке көзөмөлгө алышкан.
Мурдараак "Балдардын укугун коргоо лигасы" коомдук фондунун директору Назгүл Турдубекова дарыгерлер алдын ала кароодо эки кичине кызды өгөй атасы зордуктаган фактын ырасташкандыгын билдирген эле. Бирок сотмедэкспертиза кароонун натыйжаларын четке каккандыгына байланыштуу кылмышка шектелүүчү бошотулган болчу.
