Премьер кичинекей кыздарды зордуктоого байланышкан ишти өз көзөмөлүнө алды

БИШКЕК, 22-май — Sputnik. Премьер-министр Темир Сариев алты жана он жашар эки бир тууган кызды өгөй атасы зордуктады деген шектенүүгө байланышкан иш боюнча тергөөнү өз көзөмөлүнө алды деп билдирди өкмөттүн маалымат кызматы.

Мурдараак өгөй атасы тарабынан зордукталган деген шек жаралган эки кичине кыздын энеси милицияга кайрылганы туурасында укук коргоочулар билдиришкен. Кыздар шаардык №3 балдар орууканасына жеткирилип, бирок кечирээк энеси аларды үйүнө алып кеткен. Зордуктоого шектелүүчүнү кыздардын энеси арызын кайра алгандыгына байланыштуу укук коргоо органдары кой берип жиберген. Соттук-медициналык экспертиза кыздар зордукталган эмес деген бүтүм чыгарып, бирок оорукананын дарыгерлери мындай үрөй учурган иш болгонун ырастоодо.

Сариев Саламаттык сактоо министри Талантбек Батыралиевге кыска мөөнөттүн ичинде кыздарды көз карандысыз медициналык кароодон кайра өткөрүп, зарыл болсо, медициналык жардам көрсөтүүнү тапшырды. Ошону менен бирге Ички иштер министри Мелис Турганбаевге аталган окуяны объективдүү териштирүү тапшырылды. Социалдык өнүктүрүү министри Кудайберген Базарбаев болгон окуянын себептерин талдап, кичинекей эже-сиңди жашоочу аталган үй-бүлөдөгү психологиялык абалды иликтеп чыгышы керек. 

Териштирүү иштерин жалпы жөнгө салуу милдети вице-премьер-министр Дамира Ниязалиевага жүктөлдү.