Кыздарга зомбулук көрсөтүүгө байланышкан окуяны Турганбаев жеке көзөмөлүнө алды

БИШКЕК, 21 мая — Sputnik. Ички иштер министрлигинин башчысы Мелис Турганбаев эки өспүрүм кызга карата зомбулукка байланышкан окуяны жеке өзүнүн көзөмөлүнө алганы туурасында ведомствонун маалымат кызматы билдирди.

Мурдараак акыйкатчы Бактыбек Аманбаев Чикирова аттуу жарандын коопсуздугун камсыз кылуу жана мыйзамга жараша кылмыш ишин козгоо маселесин кароо өтүнүчү менен министрге кат жиберген. 

Башкы укук коргоочунун катында аталган жаран өзү менен жашаган кишини кичине кыздарына зомбулук көрсөткөндүгү үчүн айыптагандыгына байланыштуу ал киши жана анын туугандары аялды коркутуп, уруп жаткандыгы жөнүндө укук коргоо органдарына бир нече жолу арызданганы баса белгиленет.

"ИИМ жетекчилиги акыйкатчынын катында көрсөтүлгөн маселени жеке өз көзөмөлүнө алды", — деп билдиришти маалымат кызматтан.

Бул ишти ар тараптуу карап чыгып, шектелүүчү Аманбаевдин жасагандарына юридикалык баа берүү өтүнүчү жазылган кат башкы прокурорго да жиберилген.

Башкы прокуратуранын маалымат катчысы Санжар Абжалов аталган орган укук коргоочунун катын алганын билдирди.

"Катты алдык, ал азыр кароодо. Жакынкы арада кабыл алынган чечим туурасында кабарлайбыз", — деди Абжалов.

Аманбаев шаардын №3-балдар бейтапканасынын дарыгерлеринен турган консилиум кыздардын денесинен зомбулуктун белгилери бар экенин эки жолу тастыктаганына карабастан, сот-медициналык экспертиза калыс эмес бүтүм чыгарышы өтө тынчсыздандырып жатканын айтты. Андан тышкары, сотмедэкспертиза процедураларды одоно бузуу менен жүргүзүлгөн. Ушуга байланыштуу башкы акыйкатчы көз карандысыз медициналык эксперттерди катыштыруу менен комиссиялык экспертиза өткөрүүнү талап кылуу ниетинде.

Апасы менен жашоочу киши тараптан сексуалдык зомбулукка дуушар болгон эки кичине кыздын окуясы биринчи күндөн тартып эле акыйкатчынын көзөмөлүнө алынган.