БИШКЕК, 17-дек. — Sputnik. Жалал-Абаддын Таш-Көмүр шаарындагы ураган шахтанын алдында калып, эң акыркы болуп кечки саат 23:10 куткарылган Дайырбек Байыскуловдун абалы канааттандырарлык. Бул тууралуу Sputnik Кыргызстан агенттигине жабырлануучулар дарыланып жаткан шаардык оорукананын башкы дарыгери Алмазбек Мырзасапаров билдирди.
Эскерте кетсек, 16-декабрь күнү Таш-Көмүрдөгү шахтада мыйзамсыз көмүр казып жаткан төрт жаран уранды алдында калган. Анын экөө каза болуп, бирөө ооруканага жактырылган. Ал эми төртүнчү жаранды 28 куткаруучу кырсыктан 11 саат өткөндөн кийин аман-эсен табышкан.
Жабырлануучу Байыскуловдун айтымында, ал шахта ураары менен эсин жоготуп, бир топ убакыт өзүнө келген эмес.
"Бир жерде үчөөбүз иштеп атканбыз. Бир маалда күрүлдөп бир нерсе кулап кеткендей угулду. Карасам, шахта урап келатыптыр. Калганы эсимде жок. Өзүмө келип, көзүмдү ачсам айланам капкараңгы, көкүрөгүм менен башымдан башка жеримдин баарын көмүр басып калыптыр. Ооруганын айтпагыла. Араң дем алып жаттым. Ошондо алыстан бир нерсе ургулап жаткандай угулду. Жардам сурап кыйкыра баштадым", — деди Байыскулов.
ӨКМ куткаруучулары ошондон көп өткөй эле жабырлануучуну казып, куткарып алышкан.
Шаардык оорукананын башкы дарыгери Алмазбек Мырзасапаровдун маалыматына караганда учурда Байыскуловдун абалы канаттандыраарлык.
"16-декабрь күнү болжол менен түнкү саат 11лер чамасында Таш-Көмүр шаарынын "Северный" участогунда көмүр казып жатып, урандынын астында калган Дайырбек Байыскулов ооруканага жеткирилди. Эч жери сынбаганы менен көкүрөгүнөн ылдый көмүр басып калыптыр", — деди башкы дарыгер.
"Канатбеков катуу шок алган. Азып пландык операция камын көрүп жатабыз", — деди Мырзасапаров.
Бүгүн облус губернатору, КР саламатык тактоо министрлигинин Жалал-Абад облусу боюнча координатору ооруканага келип, жабырлануучулардан кабар алышты.
