БИШКЕК, 17-дек. — Sputnik. Жалал-Абаддын Таш-Көмүр шаарындагы ураган шахтанын алдында калган төртүнчү жаран саат 23:10 куткарылып, учурда жергиликтүү ооруканага жеткирилгенин ӨКМ маалымдады.
Эскерте кетсек, Таш-Көмүр шаарында 2016-жылдын 16-декабрында саат 12лер чамасында "Северный" шахтасынын жанында мыйзамсыз түрдө көмүр казып жаткан төрт адамды шахта басып калган. Издөө иштеринин натыйжасында 1978-жылы туулган Таш-Көмүр шаарынын тургуну Ч.Б. жана Аксы районун Райкомол айылынын тургуну У.Н. аттуу жарандардын жансыз денелери чыгарылып, Таш-Көмүр шаардык ооруканасынын сөөктөрдү кармоочу жайына жеткирилген. Ал эми 1978-жылы туулган К. Д. аттуу жаран Таш-Көмүр шаардык ооруканага жеткизилип, дагы төртүнчүсүн издөө иштери улантылган.
Натыйжада 11 сааттан ашык казуу иштеринен кийин 29 жаштагы Б.Д. аттуу жаран табылып, учурда ооруканада. Издөө иштерине жалпы жонунан 28 куткаруучу иш алып барган.
