БИШКЕК, 27-авг. — Sputnik. Кыргызстандыктардын өмүрүн алган басмаканадагы өрттүн келип чыгышы тууралуу аталган басмакананын кызматкери Кубатбек Камчиев айтып берди.
Ал каза болгондорго караганда ишке кечирээк келип, ажалдан аман калыптыр.
"Жумушка таңкы саат сегизге жакын келсем, өрттөнүп жатыптыр. Ал эми менден бир аз эрте келгендер өрттү көрбөй калып, имаратка кирип кетишиптир. Жалын заматта күчөп, шахтанын лифти менен башка кабаттарга кирип кетти", — деди Камчиев.
"Биз шатынын жардамы менен төртүнчү кабатка чыктык. Түтүндөн улам көздөн жаш чыгып, эч нерсе көрүнбөйт. Араңдан зорго бир аялды шаты менен жерге түшүрдүк. Аңгыча өрт өчүрүүчүлөр келип шатыны алдырып салды", — деди ал.
Эске сала кетсек, Москва шаарынын Алтуфьевское шоссесинде жайгашкан басмаканада өрт чыккан. Окуяга күбө болгондордун айтымында, жалын чулгаган имараттын ичинде кеминде 17ге чукул киши калып калган. Алардын арасында жаш улан-кыздар жана кош бойлуу келин калып кеткендиги айтылган.
