БИШКЕК, 18-авг. — Sputnik. Үстүбүздөгү жылдын 16-августунда нөшөрлөгөн жаандан улам жүргөн сел Бактуу-Долоноту айылында жаңы курулган ипподромго да зыян келтирди. Бул тууралуу ӨКМ билдирди.
Эскерте кетсек, суу Чолпон-Ата шаарындагы 70 турак жайдын короо-жайын, кафе-дүкөндөрдүн имаратын, мындан тышкары, "Рух-Ордо" комплексин каптап кеткен. Окуя болгон жерде ӨКМдин куткаруучулары иштеп, тазалоо иштерин жүргүзүп жатат.
Ал эми адистер кырсыкка Тогуз-Булак сайына курулуучу каналдын чегине жергиликтүү калктын дарбаза тургузуп, там-таш куруп алганы, мындан улам техника кире албай калганы себеп экенин белгилешти. Алардын айтымында, суу кетүүчү арыктарды тазалоого да тургундар уруксат бербей коюшкан.
Жаңы курулуп бүткөн ипподромго да суу көп келип, ат чуркоочу аянттын 80 метр аралыгын каптап кеткен. Учурда куткаруучулар менен тийиштүү техника тартылып, тазалоо иштери улантылып жатат.
