БИШКЕК, 12-окт. — Sputnik. Кыргызстандын коргоо министри Абибилла Кудайбердиевге карата Коррупцияга каршы кызматы тарабынан кылмыш иши козголгонун УКМК билдирди.
Маалыматка ылайык, 2014-жылдын август айында "Аскер-Курулуш" ишканасынын башкы директору, министрликтин каржысы башкармалыгынын жетекчиси жана министрдин орун басары даярдаган документтердин негизинде Кудайбердиевдин буйругу менен аталган компаниянын муктаждыгы үчүн министрликтин атайы эсебинен эки жылга 12 миллион сом берилген.
Текшерүү учурунда "Ояма" ишканасына эки миллион, "Айти-Булак" компаниясына үч миллион жана "ЖКХ Коммунальщик сервис" ишканасына 59 миллион сомдук карызына карабай жети миллион сом берилген.
Аталган факт боюнча коргоо министри Абибилла Кудайбердиев жана министрликтин бир катар кызматкерлерине карата Кылмыш жаза кодексинин 304-беренесинин (кызмат абалынан кыянаттык менен пайдалануу), 315-беренесинин (документтерди жасалмалоо) жана 171-беренесинин (ишенип берилген мүлктү өзүнө ыйгаруу) негизинде кылмыш иши козголду.
Учурда тергөө амалдары жүрүп жатат.
