Бул апта башталбай жатып, саясий айдыңда дагы "кар жаады". Дегеним, кечээ КСДП фракциясы тарс этип эле көпчүлүк коалициясынан чыга тургандыгын жар салды. Күтүүсүз болду, оппоненттер жана саясий серепчилер бул кадам референдумдан кийин болот деп болжошкон. КСДПчылар көп создуктургусу келбеди өңдөнөт.
Көп өтпөй эле "Мародерчулук такталганча акаевчи, бакиевчи делгендер менен бир боло албайбыз" деп балп этти.
Албетте бул бурулуштан соң "Өнүгүү — Прогресс" фракциясынын лидери Бакыт Төрөбаевдин кабагына кар жаап, КСДП фракциясы коалициянын тагдырын өз билгениндей чечип жатат деди.
Ал ортодо "Республика — Ата-Журт" фракциясы жаңы коалицияга кирүү боюнча сүйлөшүүгө даяр экенин билдирди.
Анткен менен КСДП лидери Иса Өмүркулов Коалициянын тарашы Баш мыйзамды өзгөртүү аракеттерине тоскоол болбой тургандыгын баса белгиледи.
Алдыда саясий соодалашуу, жең ичинен сүйлөшүү жүрөрү бышык. Ал эми ага чейин Sputnik Кыргызстан агенттигинин "Жаңы коалиция жана өкмөттүн тагдыры: эксперттер эмне дейт?" материалын сунуштайбыз.
Мындан сырткары, апта ирмеми: тамекичи маймыл, көбүккө көмүлгөн студенттер, жамбаштаган дыйкандын сүрөтүн көрсөңүз болот.
Жана жаштар менен тең жарышкан Шакир карыянын видеосун көрсөңүз болот.
Кыргызгидромет өлкө аймагында мезгил-мезгили менен кар жаай турганын билдирди. Жылуу кийингиле!
Валюта наркы. Бүгүн сомдун баасы долларга карата орто эсеп менен 68.25 (сатып алуу) жана 68.39 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 36.50 сом, Аи-95 үлгүсүндөгү бензин 39.00 сом, ал эми дизель майы 34,50 сомдон сатылууда.
Соңку сөз ордуна: Эшикке кар жааса да жан дүйнөбүз жылуу болсун.
Сулуулук эмес, жылуулук. Замандашыңыз Исмаил Мамытов.
