Жаштар менен тең жарышкан Шакир карыя: машыкпай калсам демим кысылып кетет

Жазылуу
Аравандын Чек-Абад айыл өкмөтүнүн Кызыр-Абад айылынын тургуну Шакир Табалдиев учурда 71 жашта. Ал бүгүнкү күнгө чейин спорт менен машыгат.

Жаш кезинде шпагатка кандай отурса бүгүнкү күндө да ал өнөрүн таштабай улантып келе жаткан Шакир аксакал райондун борборундагы "Кабылан" спорт клубунун эң улуу машыгуучусу. Күн сайын аталган спорт клубунда машыгып турат.

"Спорт менен жаш кезимден машыга баштагам. 1965-1968-жылы 22 жашымда Томск шаарында аскердик милдетимди өтөдүм. Аскерде жүргөн мезгилде да эркин күрөш боюнча мелдеште алдыңкы орунду ээледим. Ошол эле жылы жардыруучу зат ыргытуу боюнча биринчиликти багындырып чемпион аталдым", — дейт ал. 

Шакир Табалдиев алты уул, бир кыздын атасы. Байбичеси Кадича Табалдиева экөө 44 жылдан бери чогуу түтүн булатып келе жатат. 13 неберенин чоң ата, чоң энеси. Неберелеринин улуусу 20 жашта. Улуу уулу Алмаз Табалдиев 42 жашта болсо, кенже уулу Төрөбек Табалдиев 23тө. 

"Уулдарым да жолумду жолдоп баары тең спортчу. Эркин күрөш жана каратэ менен машыгышат. Алмаз уулум каратэ боюнча КРдин бир нече жолку чемпиону", — деди Табалдиев аксакал. 

Ал эркин күрөш боюнча 1971-жылы Фергана өрөөнү боюнча мелдеште 2-орунду ээлеген. 

"Бир аз машыкпай калсам дем алуум оорлошуп демим кыстыгып баштайт. Ооруп калам. Ал эми машыгуудан соң өзүмдү жеңил сезип маанайым көтөрүлүп калат", — деди аксакал. 

Шакир Табалдиев дыйканчылык менен алектенет. Уулдарымдын ишине жолтоо болбоюн деп машинасын өзү айдайт.

Шпагатка отурган 71 жаштагы аксакал Жан-Клод Ван Даммга чакырык таштады - Sputnik Кыргызстан
Ван Даммдан өтүп шпагатка отурган 71 жаштагы ат-башылык аксакал сырын айтты
"Кабылан" спорт клубунун жетекчиси Рустам Кадыровдун айтымында, 71 жаштагы карыянын бүгүнкү күнгө чейин машыгууну улантып келе жаткандыгы жаштар үчүн үлгү болуп, аларга стимул берет. 

"Шакир Табалдиев мындан сырткары райондогу "Эл достугу" уюмунун алдындагы элдик соттун төрагасы. Башкача айтканда, улуттардын ынтымагын чыңдап, жарандар ортосунда чыккан пикир келишпестик жаралган учурда калыс чечим чыгарып, чатакташкан тараптарды элдештирүүдө аксакал, төрага катары салымы чоң", — деди "Эл достугу" уюмунун негиздөөчүлөрүнүн бири Рустам Кадыров. 

Табалдиев өзү жана байбичесинин алган пенсиясын райондо өткөрүлгөн спорттук мелдештерге демөөрчүлүккө жумшайт.

Жаңылыктар түрмөгү
0